فيسبوك
واتساب
جرافيتى ..
كله فى سبيلها يهون
واكل أنا فيها الشقى مطحون
شامم فى هواها ديون
أضحك يقولوا .... هبيل مجنون
أزعل ....يطاردنى فى سجونها ظنون
أثور ..... يمشى فى ركابى
بدل الشهيد مليون
أرسم ع الحيطان ثورتى
غنا وفنون
يسقونى بدل المرار أفيون
زى مايكون زماني
عند البخيل مرهون
يضن بهواك على
كما الظالمين ملعون
يحن لحظه...
ويقسى على قرون
وانا مفتون ..
يجرى هواك ف وريدي
بدل الدماء كربون
بيك أنا مجنون
أزرع ضفافك
بدل الحروب زيتون
أجنى بدل السلام
أزمات وسجون
ليه أنا ف الهوان معجون ..؟
بيك أنا مفتون ..!!
وغصب عني
شايل بين ضلوعى قلب حنون
مهما تقسى على
أزيدك هوى وشجون
شايلك ف قلبى
ألف بيك الكون
ومهما طال السفر
فايت فى هواك السر
جوا التراب مدفون
جرافيتى
