فيسبوك
واتساب
قولوا لمعالى الرئيس يجيب له كرسى حديـــد
ناشف وضهره خشب ومش مريح للأيــــــــد
وقعدته مش بتلزق وشكله مايسليـــــــــــــــش
واللى يشوفه يفارقه ويتنقل لبعيــــــــــــــــــــد
......
وبلاش كراسى القصور علشان دهبها جميـــل
مُغرى كمان للعنين والقلب له بيميــــــــــــــــل
علشان كده اللى بيقعد مره واحده عليــــــــــــه
يتمنى يقعد عليه طول النهار والليــــــــــــــــــل
......
بيقولوا كرسى الرياسه جميل اوى وخطيــــــــر
وضهره فيه اجنحه وعند اللزوم بيطــــــــــــــير
والمال بيجرى اليه من غير ما ينده عليـــــــــــه
وتلاقى المعجبين واقفين عليه طوابيــــــــــــــــر
......
نصيحه منى بلاش قاعده على الكرســــــــــــــى
احسن مشاكله كتير وانا خايف على ( مرســـى )
ولو انى واثق فى شرفه وذهده وقناعتـــــــــــــــه
ولسانه دايما يرتل اية الكرســــــــــــــــــــــــــــى
......
قولوا لمعالى الرئيس اوعى تكون زعـــــــلان
انا قصدى بس انصحك احسن تكون غفـــــلان
وعشان بحبك كتير خايف يا صاحبى عليـــــك
مش عايز اشوفك نزيل السجن زى فــــــــــلان
......
والكرسى لو كان دهب وياقوت يا صاحبى يغور
والتاج اذا ذلنى هارميه واجيب طرطــــــــــــور
القرب من ربنا يغنى عن السلطـــــــــــــــــــــان
واللى يقول غير كده يبقى اكيد مغـــــــــــــــرور
......
كرسى الرئيس
