لسَّـا بيحكم وإحنا عبيد
ويطلع براءة بموكب فريد
ويرجع يحقق طموح الوراثة
ويربط ولادنا فى قيد الحديد
هيصحى ويرجع وبكرا تشوفوا
وحرسه وفرسه عليكم يطوفوا
هيرجع فتوة ويحكم بذاته
ويعدم فى خفرع ويهدم فى خوفوا
هيرجع ويهتف نظامه يزيط
ويحرق قلوبنا ويسرق محيط
يخصخص فى عيشنا يمصمص فى ريشنا
ويعلن بأنى شهيدنا عبيط
محام وأحلف بأهلى وناسى
تنحى بنفسه وساب الكراسى
دا كله مشاعر ودمه خفيف
ولكن دا شعبه عليه اللى قاسى
تواضع وأصبح رئيس السلام
وخلا شوارع عقولنا ضلام
وصوت الوسايط شايط وزايط
وخلا لسانكم يعوف الكلام
لسَّـا بيحكم وعرشه سرير
وابنه هيرجع ويصبح أمير
وياخد بتاره ويرجع لقصره
وأمكن يبعنا فى سوق الحمير
مجرد إجازة ولحظة غياب
وفترة نقاهة ويرجع شباب
ونسمع خطابه تاريخى كعهده
وينهب ويا كل بقوتنا كباب
هيطلع براءة وابنى المُدان
دا مظلوم بيدعى علينا ف أدان
بفضل المرافعة هيطعن يعارض
ويكسب قضية يدين الميدان
قاسى يا شعبى وناسى الجمايل
بجهدى وذكائى حالك دا مايل
كسفتك خسفتك وفضلى عليك
وهرجع وبكرا تشوف العمايل
صورة أرشيفية
مشاركة
اضف تعليقاً واقرأ تعليقات القراء
مشاركة
