عم يا بتاع الميكروباص يااللى سايق
ياريتك تبطل فيّا تضايق
وتبلع ريقك وتاخد هدنه
م الخناق يوماتى مع الخلايق
عم يابتاع الميكروباص يااللى بتحمل
ياريتك لآخر خطك تكمل
وتبطل تستغل الظروف
وأجرة زيادة عليّا تحمل
عم يا بتاع الميكروباص يااللى بتنادى
يالا اللى جاى حلوان والمعادى
ياريتك تقدر إن فى أرواح
راكبة معاك وتمشى ع الهادى
عم يابتاع الميكروباص إمشى سليم
وراعى إن جنبك ناس سايقين
وياريتك تستخدم الإشارة
وماتقفش ف وسط الشارع تنزل الراكبين
عم يابتاع الميكروباص ارحم ودانى
وارحم ودان الناس وطفى الأغانى
اللى معليها ومصدعنا بيها
وياريتها مفهومة أو ليها معانى
عم يابتاع الميكروباص خليك أخلاق
وحاول من غير شتيمة وخناق
تتعامل معايا خلينى أغيّر
فكرة يعنى هتاخد إيه من سواق
صورة أرشيفية
مشاركة
اضف تعليقاً واقرأ تعليقات القراء
مشاركة
