(افتح قلبك مع د.هبة ياسين)... خطيب صاحبتى

أرسلت (هاء.م) إلى افتح قلبك تقول:

أنا فتاه سنى (31 سنة)، الأخت الوسطى لبنتين، والاتنين متجوزين ومخلفين، ارتبطت بإنسان لمدة 3 سنين قبل كده، وكانت النتيجة إنه سابنى واتجوز واحدة تانية، اتخطبت بعدها لشخص آخر، كان عريس عن طريق واحدة صاحبتى، لكن للأسف طلع (بيتسلى)، يخرج ويدخل البيوت، ويخرج ويتفسح مع البنات وخلاص، بعد ما فكيت الخطوبة بفترة الشخص ده حاول يرجع لى لتانى، والموضوع ده خد وقت وكلام كتير بينى وبين صاحبتى (اللى هو جاى من طرفها)، وبينى وبين خطيبها (عن طريق التليفون بس)، لأنه اعتبر نفسه (وسيط) بين جميع الأطراف، وكانت نتيجة المباحثات هى إنى رفضت الرجوع لخطيبى الأول، لكن كان فى نتيجة تانية مفاجئه ليا وللجميع، هى إن خطيب صاحبتى اتعلق بيا جدا، وبقى يكلمنى فى التليفون كل يوم بالساعات، وشويه شويه قال لى إنه معجب بيا أنا، ونفسه إنى أنا الى أكون مراتة مش صاحبتى، كل ده وإحنا لسنا ماتقابلناش، فطلب نتقابل وقابلته، فتعلقه بيا زاد، وأنا كمان اتعلقت بيه، وعجبنى كلامه وتفاهمه معايا، خاصة إنى بعد كل العمر ده مالقيتش ولا واحد يفهمنى ويتكلم معايا، حتى من جوا بيتنا، هو كان أول واحد يحسسنى بأن كلامى له أهمية وقيمة.

بعد كده فاجئنى برضه بتصرف تانى خالص، وهو إنه كتب كتابه على صاحبتى، واللى عرفته كمان أن كتب الكتاب تم بناء على طلبه ونتيجة لإصراره، مع إنه طول الوقت بيؤكد لى إنه أى مقارنة بينى وبين خطيبته طبعا لازم تكون لصالحى، وإنى أنا الى بافهمه وقريبه منه، وكان بيقول الكلام ده لأى حد عارف بعلاقتنا، ده غير تأكيده ليا وللجميع إنى أنا اللى هاكون زوجته وهاشيل اسمه.

دلوقتى أنا بجد مصدومة، وحيرانه، وتعبانه، ماصدقت لقيت حد يحبنى ويقدرنى ويعوضنى بعد ما وصلت للسن ده، خاصة وإن كل البنات الى فى سنى وأصغر اتجوزوا، عشان كده مش ممكن اضحى بيه بالساهل، لكن كمان تصرفه ده غير طبيعى، مش عارفه أعامله إزاى؟ وأعمل معاه إيه؟، خاصة بعد ما بقتش أقدر استغنى عن وجوده فى حياتى، زى ما كان هو بيقول لى.

والى (هاء) أقول:

ودى عايزه سؤال يا آنستى الجميلة؟ واحد بيقول إنه بيحبك انت، وعايزك انت، وهايتجوزك انت، وبعدين يروح يكتب كتابه على واحدة تانية....يبقى إيه؟ امتى هاتصدقى إنه بيلعب بيك؟ لما يجيبوا أول طفل مثلا؟.

الإنسان ده اتكلم معاكى كتير، و(شم) فى كلامك رائحة اليأس والخوف من عدم الارتباط، فاستغل ده وبمنتهى الاحتراف، بنت شايفة - انت اللى شايفة ومش شرط الآخرين- إنها خلاص كبرت والقطر قرب يفوتها، ومحتاجة مشاعر وكلام حلو واهتمام، تبقى فرصة لأى واحد عايز يعيش الدور، خاصة بقى لو البنت دى كمان صاحبة خطيبته، يعنى هاتخاف منها وهاتحاول تخبى العلاقة دى على قد ماتقدر، يعنى محدش هايعرف ولا هاتطالبيه بعلانية علاقتكم... عز الطلب.

الواحد لما يحب واحده بجد، بيسعى للارتباط بيها قبل غيره بكل وسيلة، يعنى الأخ ده لو كان جاد، كان ساب خطيبته بعد ما قرر إنه عايزك أنت، وفورا، وكان خد خطوات جاده للارتباط بيك، قابل أهلك، قرأ فاتحه، عمل أى خطوه عشان ماتروحيش من إيده.

لكن هو ما عملش أى حاجه من دى، بل بالعكس، طور علاقته بخطيبته، وخلاها تبقى زوجته شرعا وقانونا، وخلاها هى اللى تشيل اسمه أمام الله وأمام الجميع، واحد يعمل كل ده - وبناء على إصراره هو زى ما بتقولى، يبقى اختار مين؟ انت ولا هى؟.

أنا مش هاكلمك على الخيانة المشتركة اللى حصلت منكم انتم الاتنين لصاحبتك، فسواء كان هو عايزك بجد ولا بيتسلى فهى خيانة، وسواء انت حبيتيه بجد ولا استجبتى لمشاعره بس، فهى برضه خيانة، مش هاقولك عملتى كده ليه، ولا شفتى جزاء الى عملتيه، ولا أى حاجه من الكلام ده، لكن هاقولك حاجه واحده بس.... بالله عليكى ماترخصيش نفسك، ماتخليش اى واحد يتكلم معاكى يحس انك (الغرقان الى بيتعلق بقشايه)، لأنك بكده هاتكونى فرصه سانحه لكل واحد من إياهم، وده الى حصل بالفعل، خطيبك الأولانى الى حس انك تنفعى للتسليه، وخطيب صاحبتك الى حس إنك ممكن ترضى بيه حتى وهو خاطب، وخاطب مين؟ صاحبتك!!.

أنا لا أتهمك بأى عيب أو سوء - أعوذ بالله - لكن ممكن انتى تكونى بتوصلى رسالة غلط عن طريق كلامك مع الآخرين، تفكيرك طول الوقت فى (اخواتى الاتنين اتجوزوا وخلفوا وأنا لأ), (الى فى سنى وحتى الى اصغر منى بقوا زوجات وامهات من زمان وأنا لسه قاعده فى بيتنا)، (أنا علاقاتى فاشله ومحدش كويس ممكن يرتبط بيا فى يوم من الأيام)، كل الأفكار دى حتى وان كنتى مابتصرحيش بيها بشكل مباشر فى كلامك، لكن صدقينى بتوصل للآخرين بدون كلام، عشان كده هاتلاقى نفسك بتجذبى نوعيه مريضه او غير سويه من البشر.

اقطعى كل صله بخطيب صاحبتك ده، واعتبرى إن موقفه معاكى ده كان درس عشان تفوقى، وتبدأى تفكرى فى نفسك وفى حياتك من هنا ورايح بشكل جديد ومختلف، فكرى فى انك بنت ومن حقك تتجوزى، لكن مش هاتتجوزى اى حدـ ومش هاترضى بأى حد، ومش هاتكونى انتى الى بتفرح بأى كلمتين حلوين مهمها كانت مواصفات الشخص الى بيقولهم، مشكلة التأخر فى الزواج مشكله فعلا، لكن مش انتى لوحدك الى بتعانى منها، ومهما كان حجم المشكلة دى مش هايساوى أبدا المشاكل الى هاتدخلى نفسك فيها لو قبلتى إنك ترتبطى بأى واحد والسلام مهما كانت عيوبه، لمجرد انك تتجوزى وخلاص.

للتواصل مع د. هبة وافتح قلبك:

h.yasien@youm7.com