على غير عادته جاء حتحوت منادياً من الشارع على العبد لله، ففتحت الشباك ورحبت به وطالبته بالصعود فرفض وقال لى: الرسالة دى جاى أقولها لك ورزقى على الله.
قلت له: طيب اتفضل يا حتحوت ما يصحش تقف فى الشارع.
رد قائلا: مش طالع.
ثم وقف يعدّل من ياقة قميصه ونطق: شوف بقى ورحمة الثورة أنا مش هسيبها تضيع من إيديا، لأنها غالية عندى وتستاهل الخير حتى لو هى بصت لواحد تانى؟
قلت له: تقصد مين اللى بصت لواحد تانى؟
قال حتحوت: اللى بحبها، لازم تعرف إنى مش هفرط فيها لازم تعيش معايا وماحدش يخطفها منى!!
حاولت تهدئة حتحوت قائلا: يا حتحوت روق بالك أنت ليه ما تفكرش تتقدم لها؟
نظر لى حتحوت قائلا:حاولت وعملتها بعد ما كنت بأقف على رجلى لمدة وصلت لـ18 يوم، أغنيلها وأنادى عليها زى روميو وانتظر ظهور الفجر مع طلتها البهية وحصل المراد وحياتك لكن ...
توقف حتحوت وهو يرفع رأسه إلى السماء، كأنه يتذكر وقفته التى كان يقوم بها لمعشوقته، لأجل خاطر عنيها وكيف كان يتمنى أن يراها بالفستان الأبيض، وأهل الحارة من كل صنف ولون يبقوا معزومين فى الفرح.
قلت: يا حتحوت سرحت فى إيه؟، لكن ليه أنت ساكت ليه؟
رد حتحوت: ما هو ناس من حبايبها اللى بيقفوا مع حبيبتى وقت الشدة قالوا لى .. ماتخفش كله تمام وروح بيتك وإن شاء الله توصلك أخبار حلوة.
قلت له: كويس عشان أنت ابن حلال ربنا بيكرمك يا جدع.
هرش حتحوت فى رأسه، ثم قال: يا سيدى طول المدة دى مفروض أتفاءل وأطمئن وأنشغل فى توضيب الفرح والبيت لكن من ساعتها لا حس ولا خبر.
قلت: يا حتحوت الغايب حجته معاه، تلاقيك ملهوف على العروسة ما ينفعش كده .. لازم تتقل يا عريس.
قال حتحوت: يا سيدى أنت عارف المدة وصلت لحد فين؟
قلت: كام يعنى يا سيدى؟
رد حتحوت: داخل على 9 شهور والعروسة مش عارف أفرح وياها بليلتنا الكبيرة فى الكوشة .. ده أنا لو كنت اتجوزتها كان زمانى بجهز لسبوع الواد، وبانده عليك زى دلوقتى عشان تاخد المغات.
قلت له: يتربى فى عزك يا حتحوت.
رد والحزن يعصر عيونه: مش باين!
حاولت تهدئة حتحوت واقترحت عليه بدلا من الكلام من الشباك أن أنزل لمقابلته فقال بغضب: لا يا عم خليك ورحمة الثورة ما أنت نازل.
فقلت له: يا حتحوت إيه حكاية ورحمة الثورة دى؟ كل شوية تحلف ورحمة الثورة؟ خير يا عم، حتى فال مش خير وأنت مفروض بتجهز لفرحك.
رد حتحوت: لما الثورة تقوم وتحس إن مبارك لسه موجود والدنيا ضايعة وماشية على أرض النفاق عينى عينك ولا فيه تغيير ولا يحزنون غير بس إلغاء التوقيت الصيفى وانتخاب عمداء الكليات.. يبقى عايزنى أعمل إيه؟ لازم أقول و رحمة الثورة!!
قلت لحتحوت: واضح إنك زعلان جداً حاول تتفرج على أى حاجة تبسطك فى التليفزيون وسيبها على ربك وأنت اعمل اللى عليك.
رد حتحوت: للأسف التليفزيون كله نكد وامبارح كان فيه مسرحية حلوة بأحب أتفرج عليها دايما لكن لغوا إذاعتها.
قلت له:اسمها إيه يا حتحوت؟
قال حتحوت وهو يودعنى: اسمها شاهد ماشفش حاجة .. ليه المسرحية دى يلغوا إذاعتها؟
صورة أرشيفية
مشاركة
اضف تعليقاً واقرأ تعليقات القراء
مشاركة
