د. طارق النجومى يكتب: المواطن قرطاس أبو الطراطير

جلس ينظر إلى الطريق المزدحم بالمئات من البشر والأصوات المتداخلة من صياح ونداء وتلاوة وموسيقى وغناء ودقات متتالية من سمكرى السيارات أسفل البناء.. سيمفونية يعجز أى فنان مهما تمادى به جموح الخيال أن يؤلف مثلها.. وقع بصره على جريدة ملقاة فى طرف الغرفة عبث بها حفيده ولفها على هيئة طرطور طويل.
انحنى والتقطها وبخطوات بطيئة ذهب لمكانه المفضل الذى أصبح يقضى معظم وقته فيه منذ أن أحيل على المعاش.. جلس على الكنبة وتربع فوقها وأخذ يعبث بالطرطور فى يديه.. وبحركة لاشعورية وضعه فوق رأسه.. أخذ يحركه يمينا ويسارا حتى استقر وغطى رأسه تماما.. فأصبحت عيناه بالكاد تظهر من أسفله.
انعكست صورته فى مرآة بجانب الحائط أمامه.. نظر إليها وابتسم وهى يتنهد بصوت عال فى نفس لحظة دخول زوجته.. اتسعت عيناها من الدهشة.. أيه ياحاج اللى أنت عامله فى نفسك ده..؟؟
مافيش ياحاجة.. تصدقى أنا حسيت براحة غريبة والبتاع ده فوق دماغى.. راحة أيه ياحاج..؟؟ بلاش قلة قيمة.. آخرتها تلبس طرطور..!!
لأ.. ده مش طرطور.. ده قرطاس.. طيب وتفرق فى أيه ياحاج..!!؟ لأ.. تفرق ياحاجة.. أنا لما لبست القرطاس حسيت بأنى بقيت اسم على مسمى.. أما الطرطور لسه شوية.

طرطور أيه وقرطاس أيه ياحاج..!! فهمنى إلهى يسترك..؟؟ شوفى ياحاجة.. أنا من يوم ماوعيت على الدنيا وإحنا لا لنا صفة ولا رأى.. لا عمر حد عبرنا ولاعمر حد عملنا قيمة.
زمان كان الزعيم يقول إن لا صوت إلا للشعب واللى صدق الكلام ده كان مصيره المعتقلات والمهانة.. وعشنا.. يقولوا لنا انتصرنا نهلل.. انتكسنا.. نهلل برضه.. ولغاية النهارده لا حد قالنا انتصرنا أزاى ولا انهزمنا أزاى ولا مين المسئول..!!
وجاء بطل الحرب والسلام وحصلت الثغرة.. لاحد قال أيه الحكاية ولا أيه الرواية.. ووقعوا الاتفاقية.. ولأحد عرف لها بنود.. وبرضه هللنا وبالسلام أحنا بدينا بالسلام وياسلام ياسلام ياسللللللللللللللام.

وجاء الريس وقال الصحوة الكبرى ومن يومها لاشفنا غير النكبة الكبرى.. باعوا البلد وباعونا معاها.. عهد القرطسة اللى على حق.. صحيح فيه ناس رفضت تلبس القرطاس.. اتبهدلوا وشافوا أيام سوده سنين طويلة.

سكت فجأة وحانت منه التفافة لأم مجاهد.. أنت نمتى ياحاجة..؟؟ وقبل أن ترد سمع صوت باب الشقة وهو يفتح ودخل عليهم ابنهم مجاهد.
مساء الخير على الحجاج.. مساء الخير يابنى.. فينك من الصبح..؟؟ كنت فى اجتماع علشان الانتخابات الجاية.. انتخابات..؟؟!! أنت ماتعرفش ياحاج.. أحنا نوينا ننزل الانتخابات.. أنتم مين..!!
الإجازة فى يناير اللى فات كانت إجازة الهنا.. وكانت الطوبة والكام غرزة اللى أخدتها فى رأسى كانوا قدمهم قدم السعد.. أنا ياحاج من زعماء الثورة دلوقتى.

لمعت عين أم مجاهد وكادت تزغرد.. ياحلاوة عليك يا ابنى..!! أهو كده.. كده أيه ياحاجة..!! فهمنى يا مجاهد أنا مش فاهم حاجة..!!؟؟
أحنا ياحاج عملنا ائتلاف من شباب الثورة وهننزل الانتخابات الجاية.. غريبة أن بقالك فجأة فى السياسة.. طيب شاركت فى المظاهرات وكل الناس شاركت.. العالم كلها كان فاض بيها.. الحكاية دى غريبة..!! وشغلك يابنى..؟؟
لا.. خلاص ياحاج أنا مش مسافر تانى.. أنا قررت أشتغل فى السياسة.. ودى شغلة أيه يابنى..!!؟؟ ياحاج دى أحسن شغلانة.. دى سبوبة فل الفل.. سبوبة..!! أيه الكلام العجيب ده..!!
يعنى هى جات عليا البلد كلها شغالة فى السبوبة دى اليومين دول.. وكله راكب الموجة وأسماء ظهرت من العدم وبقت أعلام.. ماشفتش اجتماع المرشحين للرئاسة كان فين..؟؟
ماتفكرنيش يابنى والله دى خيبة.. فيه ناس ظهرت ولاحد عارف مين قدامها ولامين وراها وأحنا شعب أصله طول عمره مركب القرطاس وبيصدق أى حاجة..!! كان أشرف لهم لو اجتمعوا فى مقر أى حزب أو فى نادى القضاة أو فى الأزهر ولا فى الكاتدرائية.. الصراحة الناس دى صغرت نفسها..!!

والغريب أنهم ماوجهوش الدعوة لواحد زى أيمن نور..؟؟ الرجل سواء كنا معاه أو لأ.. وقف وقفة رجالة ونزل فى انتخابات الرئاسة اللى فاتت.. فى وقت كانت كل العالم خايفة ومرعوبة.. فى الآخر يهمل ومن مين..!! من ناس كانت مستخبية ورا كمبيوتر فى الظلمة..!!
والمدعوون متصدرهم راجل أو ما فكر يدخل فى السياسة قال أنا ليا حصانة من الخارج.. ماحدش يقدر يقرب منى.. طيب لو ماكانش لك حصانة كنا هنشوفك ياعم الكبير..؟؟ ولا التانى اللى طول عمره كان موظف ومواقفه مواقف موظفين.. لكن العيب مش عليهم..العيب علينا اللى راضين القرطسة والاستغفال.
طيب ياحاج.. أنت مستكتر عليا الظهور ليه..؟؟ زى ماشفت واحد أخذ شهرته من شوية عياط فى التليفزيون وبقى نجم وأنا أخذتها بالطوبة والكام غرزة والهتاف فى المظاهرات والاعتصام فى الميدان.. أرزاق ياحاج.. بس ادعيلى السبوبا تخلص على خير.
تركهم ودخل ليعد نفسه لمؤتمر سيحضره فى المساء.. ماتصحى ياحاجة.. سمعتى كلام ابنك.. سمعته ربنا يبارك له.. طول عمرى كنت بقول الواد مجاهد ده هيبقى حاجة كبيرة.. كبيرة أيه..؟؟ ابنك عايز يسيب شغلانة جمع الزبالة فى اليابان ويشتغل هنا فى الزبالة برضه..!! زبالة أيه ياحاج..؟؟ أنا مش فاهمة حاجة..؟؟ مش لازم تفهمى.. اللى تشوفه ياحاج.

وبضغطة على الريموت فتح أبو مجاهد التلفاز فملأ صوته المكان.. الليلة الكبيرة ياعم والعالم كتيرة ماليين الشوارع يابا بالريف والبنادر.. حمص حمص.. واللى شاف حمص ولا كلش زى اللى حب واتلوع وماطلش.. اسعى اسعى اسعى اسعى.. خدلك صورة ستة فى تسعة.. فتح عينك تاكل ملبن.. أوعى لجيبك للعيب عيبك.. زمارة شخليلة.. عصفورة ياحليلة.. طراطير طراطير طراطير.