يا كل أم شهيد دفع دمه الطاهر لـ"عيون مصر".. متزعليش .يا كل ابن وابنة شهيد..امسح دموعك..متبكيش..يا كل زوجة شهيد.. ارفعى راسك فى السما..متحزنيش.. يا أخت وأخ وحبيبة وحبيب وخطيبة وصديقة وصديق كل شهيد.. مصر باقية وشايلة الشهدا فى عينهاز. صباح الفل يا مصر على "ولادك" الشرفاء.. صباح الفل على "ولادك" الشهداء اللى جابوا النصر.. صباحك فل يا سيف
أنت ومصطفى بنونة و
أحمد بسيونى وإسلام بكير ومصطفى الصاوى وسيف الله مصطفى ومحمد محروس وأحمد محمود ومينا نبيل وإسلام رأفت وإسلام رشاد وأحمد إيهاب وعمرو غريب.. صباح الفل عليكم وعلى كل الشهدا.. صباح الفل على "طير" قتل صياده.. صباح الفل عليكم فى جنة الرحمن.. صباح الفل عليكم واللعنة على دولة الطغيان.. رصاصهم قتلكم وأحيا مصر.. كتب لها تاريخ جديد.. صباح الفل على عيونكم الضاحكة.. صباح الفل على أحلى عيون وأحلى ضحكة.. ضحكة نصر.. ضحكة حرية وتاريخ جديد.. تحية لـ"ولاد" مصر الشرفاء.. تحية لنورها.. وشعاع أول شرارة لثورتها.. تحية لشباب صنع من دمه ثورة.. من روحه تاريخا لمصر الجديدة.. شباب صورهم محفورة فى العين والنني.
تحية لكل نقطة دم.. ضحى بها شهيد علشان الحرية.. مصر بتكبى عليكم.. ودموعها دم شريف زى دمكم بالضبط.. كل نقطة دم منك يا مصطفى أنت وأحمد ومينا وإسلام ومحمد.. طيرت ظالم.. وفاسد ..دمكوا يا ولاد مصر..نضف مصر.
دم "نضيف" خلص على عز وجمال وحزب "خرب مصر". دم "هد" دولة أمنية فى ساعات.. دمكم حول الأسود لـ "فيران مذعورة".. خايفة ضايعة.. راجعة لجحورها.. لكن هتروح فين.. هتتحاسب يا ولاد مصر.. وتدفع تمن دمكم ..دمكم غال.
قابلوا دمكم وحبكم وحريتكم بـ"شوم وطوب ورصاص حى ومطاطى وقنابل مسلية"..والذخيرة خلصت وراحت دولة الطغيان..قابلوا دمكم وحبكم بـ"حصان وجمل".. رجعوا لـ"الجاهلية الأولى" علشان يمحوكم.. تحلف وتقسم أن "أبو لهب" وعصابته ضلوا طريقهم من مكة للحجاز ودخلوا ميدان التحرير.. دخلوا وخرجوا مكسورين.. تجارتهم "الفاسدة والمسرطنة راحت" وضلت طريقها .."الجمل" ده مش رمزهم.. فى الانتخابات المزورة.. ظهر للعالم فى لحظة.. ليوضح الطغيان.. ظهر "الجمل " على الملأ.. ليقول لدولة الطغيان.. انا معاكى وهاكتب مشهدك الأخير.. وهاشهد على "الزور والبهتان" يسقط "جمل" الحزب الوطنى..يسقط إلى الأبد.
يا أم كل شهيد.. امسح دموعك.. تسلمى أنت أم البطل.. اضحكى أنت أم الشهيد.. قلبك محروق بنار الفراق.. محروق علشان شبابك راح.. حبك راح.."ننى عينك" راح.. افرحى.. ده ابنك الحر.. شد الرحال
على الميدان..طرح الأمل فينا..طرح الأمل فى مصر..افرحى وغنى..غنى وقولى:"ابنى بطل".
مشاركة
اضف تعليقاً واقرأ تعليقات القراء
مشاركة
