ريم أبو الخير تكتب: مدير مطلعش من البيضة

يكون شعورك إيه لو جابولك واحد مطلعش من البيضة وعملوه مديراً عليك؟
ولو واحد زميلك حالته زى ما أنت شايف كده أخد كل الترقيات ويا بخت من كان خاله المدير، وزميل تانى واخد راحته ع الآخر! ربنا يسهل لعبيده! وده بقى فاكر نفسه رشدى أباظة محطم قلوب العذارى، وواحد تانى عمال يقرع على كل اللى حواليه بحواديت جدو الباشا (الواقع بيقول إن المرحوم كان محولجى سكة حديد)، وده بقى زى البصل محشور فى كل أكلة، وده بقى التعلب المكار اللى بينقل للمدير الأخبار.

وده شعاره فى الحياة: النبى قبل الهدية، وده كل الحوافز وكل السفريات جاية له جاية له. وده مش عارف يقف على رجليه صحيح.. بس مسنود أوى. والهانم دى طول الوقت فى إجازة.. تيجى وخرى وتمشى بابتسامة.وإنت يا غلبانة..
معلش . شيلى بقى الشغل!
آآآآآآآآآآآآآآه.. صحيح

أصل المصريين شعارهم فى العمل.. المليان يكب ع الفاضى،
وده مولود وف بقه معلقة دهب، وبيشتغل بس فى أوقات الفراغ،
وده يا عينى شغال ليل ونهار، صحيح دنيا ليها العجب، أما أنت يا مسكين قاعد تتفرج.. تعمل إيه طب حزر فزر؟؟!!! تدعى عليهم ليل ونهار زى الولايا؟ ولا تشد فى شعرك.. ده لو بقى فاضل فيه حاجة؟! ولا تعض صوابعك من الندم إنك مفكرتش تهاجر من زمان؟
ولا تتجوز واحدة غنية تصرف عليك وتسيبك من الشغل ده خالص.. أهى فكرة برضو.. ولا تعمل ودن من طين وودن من عجين وتكبر دماغك.. ولا توريهم العين الحمرا.. ولا تنهى حياتك نهاية مأساوية.. ويا عينى أهو كلب وراح.. ولا تعمل فيهم عملة كان نفسك تعملها من زمان؟ شعر راسك بيقف من البلاوى اللى بتشوفها؟؟ ومهما اشتغلت ومهما عملت برضو مش عاجب؟؟
امممممممم..
طيب يبقى الحل إيه ؟؟؟
ها بقى وانتوا أخبار الشغل إيه؟