أحمد سعد رنان يكتب: بحلم أكون

رجعت بيتى وقولت أرتاح بعد تعب وشغل سنين
نفسى أريح نفسى شوية نفسى أنام لى ولو ساعتين
نمت حلمت كأن معايا عفريت مصباح علاء الدين
طلع العفريت قال لى اتكلم اطلب وقول تتمنى إيه؟
أمرك مجاب بس انت تطلب أؤمر وقول تحلم بإيه؟
أحلام كتير كانت فى بالى مبقيتش عارف أعمل إيه
أنا قولت أقول
بحلم ألاقى مصر طاهرة من الفساد ومن الوساطة والرشاوى
بحلم ألاقى شبابنا عامل مش مرصص ع القهاوى
بحلم مشوفش جندى مصرى من الجنود
ودمه سايل على الحدود
برصاصة غدر من اليهود
بحلم أقوم من نومى بدرى علشان هلاقى شىء يفرح
وهصحى ليه لو كنت ألاقى ألف شىء فى كرامتى يجرح
بحلم أشوف المصرى راسه فى السما
نفسى ميكونش فى حياته أى حاجة مؤلمة
نفسى ملاقيش أى مصرى ف أى دولة بيندبح
بحلم أكون إنسان فخور بنفسى وبمصريتى
بحلم أكون إنسان بسيط عايش سعيد مع أسرتى
بحلم أنادى بعلو صوتى واتسمع
بحلم أشوف أمتنا واحد بتنجمع
بحلم يكون بعد اللى شوفته قلبى بطل يتوجع
بحلم أعيش مرتاح البال
بحلم ألاقى عيش حلال
بحلم أشوف للمصرى هيبته ورنته
بعد الزمان م كسر له ضهره وقوته
بحلم ألاقى المصرى وأقف جنب جاره ف شدته
بحلم أموت و ف ذهنى صورة مصر عالية
بحلم أموت وأنا ناسى كلمة مصر نامية
بحلم أموت شايف حياة المصرى راقية
بحلم كتيير والحلم سهل يكون حقيقة
بحلم كتير والحلم حقى إنشاء الله حتى لو دقيقة
بحلم وحلمى فى أى وقت نهار وليل
بحلم أشوف حاضر وماضى
مش بس كله أهرام ونيل