هناء المداح تكتب: حقيقة مؤلمة

فى إيه حصلك يا بلد.. ليه كل شىء فيك فسد..

طفش الضمير كدة للأبد؟.. سيبانا ليه للمفسدين..

ليه المواطن يتجلد.. يندم فى يوم إنه إتولد..

ليه الكبير فيكى أسد.. فى غابة إحنا ولاّ فين؟!..

فيكى الأمور متأزمة.. فساد فى كل الأنظمة..

ليه الحلول متحزمة.. وكل ده بأمر مين..

الحق ليه صوته اختفى.. مشوه بعيد؟ شكله اتنفى..

مصالحنا ليه متكتفة.. ولحد إمتى مش عارفين..

فقد المواطن قوته.. ليه يبات يخاف على لقمته..

ده الوضع ده هيموته.. ليه عنه دايماً ولا سائلين..

حجم الفساد بقى للركب.. أموال بلدنا بتتنهب..

لازم رشاوى لو لك طلب.. والواسطة دايرة شمال ويمين..

ليه فينا ناس حبة الخراب.. حاضنة الفساد فاتحة له باب..

حكمت علينا بالعذاب.. نعيش هنا دايماً ضايعين..

هقول حقيقة مؤلمة.. مجالسنا كلها مكلمة..

إعلامنا كله مفلمة.. أما الحلول دى بعد حين!..