يوقع الشاعر سالم الشهبانى فى الثامنة من مساء اليوم الخميس، بمقر حزب التجمع، ديوانه "شبر شبرين"، والصادر مؤخراً عن دار "اكتب" للنشر والتوزيع.
و"شبر شبرين" هو الجزء الثانى من مشروع ديوان "الأبيض كل الألوان"، والذى يضم مجموعة الألعاب الشعبية المنتشرة فى أقاليم مصر.
وصدر لسالم الشهبانى دواوين "ولد خيبان" و"السنة 13 شهر" و"القطة العميا" و"الملح والبحر"، وشارك فى العديد من الفعاليات الشعرية داخل وخارج مصر.
ويقول الشهبانى فى إحدى قصائد ديوانه:
أسود
ضلى على الأسفلت
وبدلة العسكرى السودا
اجبرونى على الوقوف صف تانى
والكلام عن لون ماحبتهوش
لون يساوى
خوف من غيب مابعرفهوش
أو غياب بيساوى خوف من لون ماحبتهوش
لون يساوى طرحة أمى ودمع بيبلل هدومى
لون يساوى
موت غفير الدرك فى المستشفى الحكومى
لون يساوى ظلم ظابط لبياع مناديل فى الإشارة
بيهينه بالركل والضرب
لون يساوى قسوة الواقع من النظر عن قرب
لون مابيحليش غير للغلابة
واللى ساكنين الرصيف
واللى بيموتوا فى الطابور
بحثاً عن رغيف
لون يسيبنى كل مرة قدام سؤال
أيه اللى ممكن يعمله الشعر
لإنسان ضعيف؟
أيه اللى ممكن يعمله الشعر
لقصيدة ف الشارع بتعصى ع التصنيف؟
