آه لو انساكى يابلدى .. واستريح
وابعد اللهفة عليكِ لمّ بسّرح
واخنق الحلم اللى فى بعادك بيدبح
كل حاجة فيكِ حلوه
غصب عنى .. عايز أنسى
إن سجانك فى زنزانه شايلني
والكلاب اللى ببابه مبهدلني
والعيال تصرخ وهما مجرجرني
يوم ما قتّلهم بإيده واتهمني
غصب عني
لازم اهرب
غصب عني
كنت خايف انى أقرب
كممونى والإدين عمّاله تضرب
سيبه يهرب!!
الكبير عمال ينادى سيبه يهرب
إنت لسه شفت حاجه
كل يوم هتشوف زياده
هو ده أمر السعاده
أصلنا نحب المفتّح
واللى بيعادى السياده
واللى قام يهتف ويرقص
"للمعارضه" فى الإعاده
قول لعمك يا "عباده"
لسه بكره فيه إعاده
أما اشوف آخر كلامك
لما تصحى من منامك
إنت فاكر هيه سايبه
جى تعلن إنتخابك !
فز وامشي
دهيه تاخدك واللى جابك
إنت مين ياابن القديمه
لما تبقى بتاع علينا
جاى تصوت طب أهوة
روح ...... وصوت
لو تبات قدامنا تلطم ...مش تصوت
اللى هنعوزه هيمشى غصب عنك
دهية ف امك
المجالس تبقى وطني
والمناصب برضه وطني
والحكومة حزب وطني
واللى راح يحكم جنابك
طول حياتك وف مماتك
حزب وطنى ... آآه يا وطنى ...
وآه يابلدي
ياللى دبحانى بهمك
بس اقولك
لسه جوه عروقى دمك
بعد إذنك
وَسّعى وخدينِى جنبك
واما انام خبينى عندك
مش هخاف منهم فـ قربك
كل أملى بعد إذنك
إن اموت هنا جوه حضنك
قبل ماانسى بعتذرلك
ما اللى قولته واعترفلك
طول بعادى كنت فاكرك
الغيطان والناس وبحرك
جوه منى رسمت صورتك
وف منامى ماخفت منك
بس انا مرضتش اقولك
إن أنا بيوحشنى حلمك
مشاركة
اضف تعليقاً واقرأ تعليقات القراء
مشاركة
