محمد سامى يكتب: اعتصامات وإضرابات

الو.. الو.. أيوة كده الصوت واضح طب كويس بسم الله..

أنا محمد عبد القادر معاكم، أيوه أنا بقصد العنوان اللى فوق ده حضرتك دى جملة الزعيم "أحمد عرابى" الشهيرة "لقد خلقنا الله أحرارا ولن نستعبد بعد اليوم"، متستغربش إن أنا غيرتها بس ده للأسف بيحصل فى بلدنا..

كل يوم بقعد جايب كوباية النسكافيه بتاعتى، التمام السكر الزيادة، وأقعد أتفرج على برامج التوك شو اللى تحرق الدم وتجيب المرارة زى اللى كانت عند الريس اللى بقت دلوقتى أشهر مرض ممكن يجيلك لأنها جت للريس بقى وشك ده إذا كان الريس جاله المرارة إحنا هيجيلنا أيه !!! أكتر حاجة بقت موجودة فى بلدنا اليومين دول مش الأمراض لا دى الاعتصامات والإضرابات يا راجل دى وصلت لفيلم "رامى الاعتصامى ".

تلاقى بقى على رصيف مجلس الشعب وعلى رصيف مجلس الشورى على سلالم نقابة الصحفيين والمحامين دى بقت بالحجز دلوقتى الشركة دى تمشى تيجى غيرها تعتصم، الفئة دى تمشى تيجى غيرها، الرصيف ميفضاش دقيقة عالطول تيجى فئة تانية جميع طوائف الشعب بقت معتصمة" شركات قطاع عام، قطاع خاص، مصالح حكومية، مدرسين، دكاترة، مهندسين، الشهر العقارى و المدعى الاشتراكى.

للأسف حالنا بقى يحزن اللى بيقبض 100 جنيه فى الشهر، وسبحان الله البلد كلها فى وقت واحد بقت تقبض 100 جنيه إزاى مش عارف مهو لو اتصرف علينا مدارس ومصاريف ودروس وجامعة والبلد بتصرف ملايين على التعليم، وفى الآخر هنطلع ناخد 100 جنيه، نقفل الكليات والمدارس بقى مهى مش هتجيب همها، هو الحل يا الحكومة دى تمشى، يا العشب كله يموت، وتصحى الحكومة الصبح متلاقيش حد تحكمه، يجيبوا عقد عمل بقى ويروحوا السعودية بقى، "الزعيم عادل إمام" بس احنا دلوقتى عادى خدنا على الاعتصامات والإضرابات، لكن بجد اللى وقف قدامه اعتصام جديد من نوعه خالص فى اسكندرية يا ترى أيه يا ولاد "اعتصام رجالة وحريم بالملابس الداخلية فى الشارع" بس يا قليل الأدب أنا سامعك عاوز تروح تعتصم معاهم، اصبر بس اسمع .. أنا مش هسأل اعتصموا ليه ولا بالشكل ده ليه، أنا بس عاوز أعرف أيه اللى يوصل 300 أسرة فى اسكندرية إنها تعتصم فى الشارع بالملابس الداخلية تتخيل؟؟ يبقى الحكومة دى عاوزه أيه" أيوه بالضبط كده ، متقلقش الستات هتقعد فى خيام وهتتقفل عليهم بس برده بالملابس الداخلية، أنا ماليش دعوة برجالتهم، ازاى يعملوا كده أنا ليا دعوة، ازاى وصلوا لكده حرام ده ولا حلال؟؟ لو عرفت الإجابة اتصل على 09000000 دى نمرة حكومية للمشاكل، بس انصحك متتصلش لأن محدش هيرد عليك..

طب الناس دى هيبقى شعارها أيه؟ أكيد "لقد خلقنا الله عرايا ولن نلبس بعد اليوم"، مش لابسين، مش لابسين، هنفضل هنا عريانين.. للأسف هو الموضوع لا يدعو للسخرية لكن فى بلدنا كل شىء بقى سخرية حياتنا سخرية، عيشتنا سخرية..

عماااااااااااااااااااااااار يا مصر ..