اللى عـايش فيهـا نـفسه
يلقى على باسبوره فيزا
واللى برّه هَزَمُه يأسُــه
غُربتــه مابقتش مــيـزة
واللى واقف بين بينين
لســـه قُـــــدامه البابين
لو قفــل بـــاب الحنين
تنجــرح نفـسه العزيزة
إختيـــار مافيهـوش بدايل
ينجـــد الروح من وجعها
والرحيـل بين دمعه شايل
ذكريات رافضين وداعها
من بــــــلاد الله لخـلقه
البراح مين اللى خانقه؟
والونس إيه اللى قـالقه؟
والخطــاوى مين خـدعها؟!
قاسية غـربة روحنـا فينا
بين دفا الأوطان وجوعنا
الشــــراع خـــان السفينة
ولاَّ سلمنــــــــا لوجعنـــا
إيـــه اللى خلانا جازفنــا؟
كان طمـوحنا ولا زيفنــا؟!
ف السفر حاضنين نزيفنا
وخـوفنا بيعـــاند رجوعنا
واللى عايش فيهـا نفسه
يلقى على باسبوره فيزا
واللى برّه هَزمُه يأسُــه
غُربتــه مابقتش مــيـزة.
الشاعر أشرف الشافعى
