أحمد صلاح محمود يكتب: كل حلمها دبلتين

كان زمان كلام الحب زى المطر
كان الواحد بيكتب قصايد مالها عدد
دى حب... ودى غرام
ودى همس.... ودى كلام فى كلام
وكانت حلوة وماشية الأيام
كان الواحد ماشى صدره مفتوح
بيضحك من قلبه وفرحان
عمره ما يعاتب حد
ولا فاكر إنه شال من حد
ولا بات ليلة زعلان
كان واخد الدنيا هزار فى هزار
ويشوفها ماشية ازاى
يعاكسها ويمشى ضد التيار
والليل عنده احلى ما فيها
والعصر أحلى ما ف النهار
كنت بستنى حبيبتى بالساعتين
ونمشى مطرح ما تودينا قلوبنا
عمرنا ما سألنا رايحين فين
ولو يوم قالت آسفة
لهجرك ياواد مضطرة
أقول ولا يهمك
بكرة انسى
وأحب تانى تالت يوم
من غير زعل ولا لوم
أما دلوقتى يا قلبى
بقيت م الحزن معبى
وجواك يا ما هموم
بتقول بحبك بالعافية
بشفايف حزينة وخايفة
مع ان الحب زى ما هو
بس انت اللى اتغيرت
فاتت سنين وكبرت
والايام قلبت جد
وعرفت انها مش بتهزر
وإن زى ما فيها صدق
فيها كتير كدب
بس حبيبتك ذنبها ايه
تزعل منها وتشيل ليه
دى زيك أغلب م الغلب
بتحلم زيك تبقى معاك
وعارفة ظروفك وعذراك
ورغم ده كله
جوا العين شيلاك
وبتحلم زيك بالقليل
لا طالبة قصر ولا سكن ع النيل
عاوزة بس دبلتين
و قلب دايب حنين
وان شا الله تقضوها برغيفين