فاطمة أول بنت مصرية تعلم الماكياج أون لاين مجانًا

التجميل هو ثقافتها الخاصة التى طالما حاولت أن تنشرها بين فتيات جيلها، لتجعل من قلم الروج وفرشاة "الأى شادو" سلاحًا لها يحقق هدفها فى تصحيح المفاهيم الخاطئة عن الماكياج لدى السيدات المصريات ونشر قواعده الصحيحة ليستفاد منها الجميع دون شروط.

لذلك قررت فاطمة يحيى، أن تطلق قناتها على "يوتيوب" بالتعاون مع المخرج بلال إبراهيم لإعطاء كورسات تجميل مجانية أون لاين، بطريقة جديدة على برامج التجميل المتخصصة، فلم تستعين بـ"موديل" لتشرح من خلالها قواعد الماكياج إنما اكتفت بنفسها لتعلم الفتيات كيفية وضع الماكيج لأنفسهن بطريقة المحترفين.

وعن فكرة كورسات الماكياج الأون لاين تقول: "من صغرى وأنا بحب الماكياج جدًا وبحاول أتفرج على برامج التجميل علشان أتعلم، لكن للأسف النوعيات دى من البرامج نادرًا لما بتعرضها القنوات بشكل احترافى".

وتضيف: "دايمًا بيجيبوا موديل وخبيرة التجميل تبدأ تشرح الخطوات على وجهها ودى طريقة مش عملية لأنها مش بتعرفنا كيفية وضع الماكياج لأنفسنا، غير إن لو فاتنا لقطة أو خطوة مش بنقدر نعدها تاني، علشان كده بتبقى عديمة الفايدة لأننا كمان بنبقى ملتزمين بمعاد عرض البرنامج مش أى وقت نحتاج نتعلم حاجة معينة بنلاقيها".

وتتابع: ومن هنا جات فكرتى فى إطلاق قناة على "اليوتيوب" بمعاونة أحد خبراء الموضة والتجميل فى مصر، وتصوير فيديوهات لكل قواعد وخطوات الماكياج بأنواعه المتعددة من خلال الشرح على وجهى ووضع الماكياج لنفسى من غير استعانة بموديل، علشان تتعلم البنت إزاى تحط ماكياج لنفسها بسهولة ونشرها على القناة.

وعن النجاح الذى حققته فى أقل من أسبوع تحكى: من أول أسبوع نشرت حوالى 3 فيديوهات على القناة ومكنتش أتوقع النجاح الكبير ده، الفيديوهات تعدت 40 ألف مشاهدة فى أقل من أسبوع، وده الشىء اللى دعمنى ومخلينى مستمرة فى إعطاء الكورسات "أون لاين" مجانًا.