فيسبوك
واتساب
كلمة الحق اللى توجــــــع قولها ميهمكش حاجـــه
واللى يزعل منهــــا يولع والكلام من غير ديباجــه
الحريقه تقيــــــــد وتطفى والحرامى يروح ويخفي
وانت عارف لمـــــا تحفى مش حاتفهم أى حاجـــه
لما يبقى البيــــــه حرامى عنده أكتر من محــــامي
اللى مصرى واللى شامى مش حاتمسك أى حاجـه
يابنى دول عينهم قويـــــه ف الشطاره ميه ميـــــه
يخبط الخبطه اللى هــــــى وان وقع يعمل خواجــه
والخواجه سره باتـــــــــع مهما يعمل نجمه ساطـع
وان أخد له حكم قاطــــــع يجرى يهرب من سفاجه
الفساد ياخوانـــــنا عشش والضمــير ميت ومشش
واللى مالغربــــال مبصش يبقى معمى ف كل حاجه
إمتى بس نصون بلدنــــــا لجل خيرنا وخير ولادنـا
لوما صلحناش بإيدنــــــــا يبقى ننسى أى حاجــــه
