هشام الهلالى يكتب: وزارة العدالة الاجتماعية فين يا عم؟؟

بعد ثورتين وحبة اعتصامات ومليون مظاهرة مشكلين حبة فئوى على حبة معارضة للمعارضة والسلام، على حبة إثبات وجود، على حبه متسلطين، على حبة مسطولين، على حبة مسلطنين، على حبة قابضين، على حبة مدربين، على حبة مش لاقين يأكلوا على حبة "فاضيين" ووقت الفراغ طويل على حبه مشهورين وبيزودوا شهرة وفى الآخر لا فيه أحزاب معارضة ليها دور أو وزن ولا فيه عدالة اجتماعية بحق وحقيقي.

يعنى أيه الأول عدالة اجتماعية؟

بالبحث والتقصى عن معنى هذه العبارة المتكررة فى وسائل الإعلام وغير المفهومة من جموع السادة المصريين الغلابة وجدنا أنها تعنى توفير حد أدنى للحياة الكريمة من مأكل وملبس ومشرب وبالمرة تعليم وصحة والله أعلم؟ نقول كمان يعنى مثلاً واحد مصرى قادر يشترى مياه معدنية للشرب وأخوه بيشرب مياه ملوثة يعنى أمراض وأوبئة يعنى مصاريف علاج يعنى موت وخراب ديار، يعنى بدل ما أمنع سبب المرض واصرف على مشروعات توصيل المياه اصرف على الدواء، وكلها سبوبة ولأن المصريين لا ينعمون بمظلة تأمين اجتماعى زى الدول المحترمة اللى فاهمة إن خدمة مواطنيها واجب ومسئولية وإلا لما يحكم من يحكم دا مثلا؟!

أيه كمان يعنى فرص عمل متوافرة وبشكل مناسب ومتكافئ يعنى من غير واسطة دا مثلاً يعنى ضمان اجتماعى يصرف للغلابة ويكون له حد أدنى بناء على جدول واضح.. الحالة والعدد وما يتقاضاه، وكمان حد أدنى للمعاشات وحد أدنى للأجور وحد أقصى للأجور دا مثلاً يعنى تنميط لشكل الخدمات يعنى المدرسة تشبه المدرسة اللى فى كرداسة شبه اللى فى الزمالك يعنى الكل يدرس نفس المناهج ويدرس فى نفس مساحة وشكل المدرسة يعنى نخفف الفروق بين طبقات مجتمع دائمًا خاسر بالثلاثة لضعف العدالة بين سكانه يعنى نرجع فى خصصة التعليم يعنى القادر يدفع رسوم للتعليم فى الحكومى مش فى الخاص يعنى من حقى أمشى فى طريق صحراوى منور مش لأنى دافع رسم عبور بس لكن لأنى صاحب بلد يعنى حاجات كتيرة الكل فاهمها لكن يبدو أنها مش على الهوى وعلى رأى واحد مصرى بسيط جدًا محدش هيصعب عليا عشان مصعبتش على حد.