وأنا ماشى فى شارع اسمه شارع الفن فى مصر المحروسة شوفت العجب شوفت زبالة ولمامة بيتقال عليها فن شوفت أفلام العرى بيتقل عليها فن شوفت هطل شوفت هبل بيتقال عليه فن حد يغنى للعنب باسم الفن ويغنى للحمار ويتقال فن وللشبشب ولحاجات تانية كتير ملهاش علاقة بالفن، لكن بيتقال عليها فن بقيت ماشى بخبط كف فى كف.
وأنا ماشى في الشارع ده قابلت راجل من اللى بنقابلهم كتير اليومين دول من اللى مطوليين دقنهم فى عشوائية ومقصرين جلبياتهم وعمال يزعق بصوت عال وبيقول:
-حرررررررررررررااااااااام
-فيه إيه يا حج
-حرررررررااااااام
-فيه أيه ياعمونا
-حرررررررررررااااام اللي بيعملوه ده حررررررام
-أيوه صحيح عندك حق ضيعو الفن في بلادنا الله يسامحهم
-فن أيه!!!! بقولك حرام
- أيوه عارف هما خلوه ميسواش تلاتة ابيض مابقاش فن خالص
- فن إيه وهطل إيه وعبط إيه هو فيه في الإسلام حاجة اسمها فن دى بدعة وكل بدعة ضلالة وكل ضلالة فى النار
كان رد فعلى أن (هااااااااااااااااااااااار أبيض) قلت له
-إيه اللى حضرتك بتقوله ده مين قال إن الإسلام ماكنش فيه فن أومال العمارة الإسلامية اللى فى كل مكان حوالينا وكلها إبداع ده تسميه إيه ، ده فن وفن بديع وفن عظيم.
-آه ياكافررررررررر إسلام إيه اللى فيه فن الفن ده بدعة وكله اللى بيشتغلو فيه وبيتفرجو عليه فى النار.
-كافر! حضرتك مش من حققك تكفرنى ده أنا بشكر فى فن العمارة الإسلامية تقوم حضرتك مكفرنى طب بص شايف المئذنة اللى هناك دي شوف جميلة إزاى شوف الهلال اللى فوقيها معمول روعة إزاى ومن مئات السنين شوف الجوامع اللى من مختلف العصور الإسلامية روعة إزاى تقوم تقولى يا كافر
-حرررررررررررراااام
-حرام إيه ده ممكن تعود بنفع عظيم على البلد لو اتعمل فن صح يعني عندك مثلاً فيلم زي The Dark Knight جايب مليار وأربعة مليون دولار والجزء التاني منه جايب مليار وواحد وتمانين مليون دولار، وفيلم تانى زى بتاع جيمس كاميرون اللى اسمهavatar جايب اتنين مليار وسبعمية اتنين وتمانين مليون دولار تخيل لو كانوا كل دول أفلام مصرية شوف قد إيه الفلوس دي كانت هتفرق معانا
-مال حررراام.
-يابيه الأفلام دي كلها مافيهاش مناظر وحشة كلها ببتكلم عن البشر والفوضى وبتناقش مشكلة حقيقية والفيلم الأخير ده بيتكلم عن الطبيعة الاستعمارية لأمريكا
-حرررررررررررراااااااااااااام.
- طب يابيه أنت خليك في حرررامك ده وسيبني أنا أبكى على حال فننا اللى ضاع وسط الفقر والجهل والفساد اللى إحنا فيه
ويبقى حلمنا هو(عيش-حرية-عدالة اجتماعية).
علم مصر
مشاركة
اضف تعليقاً واقرأ تعليقات القراء
مشاركة
