لميت كل الأسامى ورميتهم جوا دمى
وجيت أشوف مكانهم..
ملقيتش أى اسم غير اسمك ياأمى
لقيته جوا قلبى
ومقدرتش أخبى
خبيت أنا كل حاجة..ألا حبك ياامى
وماشى فى كل حتة
بقول على قلبى حتة
من قلبك ياأمى
وف كل خطوة غنوة
بقولهالك ياحلوة
يا أحلى شىء فى عمرى
ياأول..وأحلى كلمة ينطقها لسانى
على شطك قلبى موجة..والعشق ربانى
خلقة الإله فية بعديها خلانى
أجى الحياة دية وألقاكى حضنانى
بحبك
بحبك..قبل ماأتعلم كلام الحب
وقبل عنية ماتسلم على عنيكى ياروح القلب
بحبك..قبل ماأعرف أن حبك أمر
أمر الله..
وأمر رسولة
أعيش تحت رجليكى طوال العمر
بحبك..ولو حتى الطريق ليكى...
راح أمشيه كله فوق الجمر
دا يوم مابتبعدى عنى
بااحس بأنى مش منى
وأقول.. ياكلمتى غنى
ونادى لأمى تحضنى
مافيش غيره ياامى..
حضنك هو اللى بيسعنى
باأروح ع الوردة أقطفها.
.ألاقى الشوك محوطها
أسمى الله وأقول أمى
ألاقى العشق فى أوراقها
ألاقى الشوك بعد عنها
وتصحى تفوق من أحزانها
وتفرح لما أقول ليها
لأيد أمى راح أهديها
كأن ف أيدها بستانها
وفى الآخر مافيش آخر
حبك..لا ليه أول ولا آخر
ولا يتقال عشان خاطر
ولاضعفان ولا قادر
دا كل اللى ليه أم..
ومايبسش تراب رجليها
أقل مافيها يكون ناكر
ومش كفاية
مش كفاية عليكى يوم
ياللى شيبتى من الهموم
كل يوم بأأشوف عنيكى
عيد عليه وعيد عليكي
كل يوم وأنا بين أيديكي
ابن صالح بار بيكي
وكل يوم وأنتى ف عنيه
ياللى شيلانى ف عنيكي
مشاركة
اضف تعليقاً واقرأ تعليقات القراء
مشاركة
