إمام محمود على - سائق
أغلبها مسلسلات ليس لها أى قيمة أو معنى، باستثناء مسلسل أو 2، والمشكلة إن فيه مسلسلات لا يصح على الإطلاق عرضها فى التليفزيونات فى البيوت، مش لأنها أقل من المستوى، ولكن بسبب إصرار الممثلات فيها على الخروج على الذوق والأخلاق، سواء عن طريق الملابس أو الألفاظ، والمشكلة أن المسلسلات دى بتتعرض بالليل وترجع تتعاد تانى بالنهار دون مراعاة لحرمة الشهر الكريم.
حنان محمد - صيدلانية
مش ممكن العدد ده حد يقدر يتابعه بسهولة أو يركز معاه أو حتى يعرف مين من الفنانين فى أى مسلسل من غير ما يتلخبط بينهم ده تقريباً عدد المسلسلات هذا العام أكثر من 50 مسلسل تقريباً ده غير الحاجات بتاعت الست كوم، طيب هو شهر رمضان حيبقى شهر مسسلسلات بس ولا إيه ما هو فيه حاجات تانية كتير غير التليفزيون الخروج بره البيت والعزومات.
محمد نبيل - فنى كهرباء
دى مش مسلسلات فيها حكاية ولا حاجة الموضوع بالنسبة للعالم ده مش أكتر من سبوبة والناس بتاكل من وراها عيش يعنى حضرتك النهارده أى مسلسل القصة بتاعته كلها متخدش أكتر من 10 حلقات بالكتير ده إذا كان المسلسل جامد ويستاهل الفرجة عليه لكن اللى بيحصل إنك تلاقى شهر رمضان خلص والمسلسل شغال.
ياسر سمير - صاحب شركة
هى المشكلة مش بس فى زيادة المسلسلات والقنوات الفضائية كمان زادت جداً وطبعاً كل قناة عاوزة يبقى لها جمهور وبتحاول أنها تتواجد فى بيوت المشاهدين فى شهر رمضان عن طريق هذه المسلسلات وعموماً رمضان لسه فى الأول ولحد الناس ما تعرف المسلسل الكويس عايزين 10 أيام على الأقل.
فؤاد محمد - أعمال حرة
هو المشكلة مش فى عدد المسلسلات فى شهر رمضان المشكلة كام مليون جنيه اتصرف عليها زيادة علشان تلحق تتعرض فى شهر رمضان مع أن هذه الأموال لو تم إنفاقها فى أى مؤسسة خيرية باسم المسلسل أكيد حتكون فكرة كويسة للمسلسل بس بشرط إن اللى يعمل كده يكون مسلسل محترم.
أحمد محمود - مراقب حركة بشركة نقل
تزيد ولا تنقص يعنى هى الناس مش وراها حاجة غير المسلسلات فى شهر رمضان علشان تقعد تتفرج عليها أكيد كل واحد عنده حاجات تانية مشغول بيها فى شهر رمضان اللى بيروح يصلى التراويح أو اللى بينزل شغل تانى بعد الفطار.
