هند على جمال تكتب: مش هدعى عليك

عشان أنا أكبر من إنى أذيك
عشان قلبى كان يوم حواليك
عشان إيدى دفيتها أيديك
عشان فى يوم كنت خايفة
و طمنتنى عينيك
مش هدعى عليك
عشان أنا أكبر من إنى أذيك
وعشان مش عايزة اشيل ذنبك
بقولك روح وخد قلبك
روح وعنى ابعد بعيد
عمرى ما هكون ليك أكيد
خد كل ذكرياتك
مع غيرى عيش حياتك
عيش معاها وخونها
اجرح قلبها بكى عيونها
أنا لا.. . أنا كتير عليك
أنا عمرى ما هكون ليك
بس أوعدك متخفش
منى أنا متقلقش
مش هدعى عليك
عشان أنا أكبر من إنى أذيك
عشان الدنيا زى ما هى ليك
هيجى يوم وتبقى عليك
خونت بجدارة
لكن خسارة
فجأة كده من غير إمارة
حقيقتك بانت عليك
والكل انفض من حواليك
مخدعتهمش دموع عينيك
مكدبش عليك
كتير فكرت ف الانتقام
لكن حرام
كفاية جُبنك اللى أذيك
ده خسارة فيك حتى السلام
همشى كده من غير كلام
من غير جراح
من غير آلام
ده حتى الدعوة خسارة فيك
وعشان كده
مش هدعى عليك
عشان أنا أكبر من إنى أذيك