إنتو ليه كاسفين إيدينا؟
إنتو ليه جايين علينا؟
إنتو ليه ناكرين جميلنا؟
إحنا ليه منكو اتنسينا؟
لما قلتو راح نصنّع
كنا زى البرق واسرع
جينا نبنى ألف مصنع
واسألوا حلوان علينا
لما قلتو نبنى سد
وقت ما ساعدكمش حد
إحنا جينا نبنى ليكم
جينا بفلوسنا وإيدينا
لما كت أمريكا ترفض
كنا أول ناس تسدد
مال بعتنا.. قمح بيتنا
واللى ناقص كان عنينا
كنا عايزين الصداقة
كنا عايزين الشراكة
كنا عايزينها علاقة
تتوجد فى الشرق لينا
ياما ناصر جه وزارنا
ياما شرفنا ف ديارنا
كان بيحبس فى الشيوعى
عمرنا ما احنا اشتكينا
لما هجمت إسرائيل
كت لأمريكا عميل
إحنا كنا بنساعدكم
حتى لو مش عُملا لينا
جينا تانى نبنى جيشكم
جينا ع الأرض نشارككم
حائط الصواريخ بتاعكم
فيه بدم كتير روينا
والسادات جه يوم طردنا
بردو ما زعلنا وساعدنا
زى ما تقولو غرامكم
داء ودم بيجرى فينا
جيتو بعديها وحاربتو
وبْسلاح روسى انتصرتو
شوفو كام مِيت آر بى جى
هتلاقوه مدفون فى سينا؟
لما جيتو فى الاتفاق
شوفو بقى معنى الوفاء..
قلتو أمريكا هتحكم
روسيا ملهاش دعوة بينا
هيه أمريكا فى صفك؟
إللى زرعت فيك عدوك؟
يبقى تتمرغ فى حضنك؟
وحنا طوبة واترمينا؟
أيوه آه بتبعت مساعدة
وف قصادها كتير وواخدة
والأهم إن سياستها
عمرها ما كانت أمينة
هوا بسلاح عم سام..
تأذى إسرائيل يا خام؟
ولّا يبقى مين عدوك..؟
حد غيرها يا أخينا؟
ثورة جواكم وقامت
بس أمريكا ما نامت
عايزة حد يبيع فى أرضه
عايزة قاعدة.. عايزة مينا
حبكم ليه أمريكانى
رغم إنه حبيب أنانى؟
ياما خانكو انتو وعربكم
ونتو ما تقولو اكتفينا
بُصو حتى لسياحتكم
شوفو أكتر ناس تزوركم
رغم ثورة.. رغم فوضى
عمرنا ما خُفنا.. وجينا
إحنا لسه فى الميزان
ما تقولوش دا كان زمان
تبقى غلطة لو افتكرتو
إننا ضعنا.. انتهينا
إحنا لسه موجودين
ونتو جربتو احنا مين
بس لازم تيجى منكم
واللى هيعوزنا يلاقينا
الزعيم جمال عبد الناصر
مشاركة
اضف تعليقاً واقرأ تعليقات القراء
مشاركة
