أنا عايز أكون حاجة.. أكيد الجملة دى كلنا قلناها وقلناها كتير كمان.. ولو مقولتهاش يبقى محتاج تقعد مع نفسك شويه حلوين كده وتفكر أنت نفسك تكون أيه نفسك تكون إنسان ناجح وليه مستقبل يفتخر بيه ولا إنسان فاشل أنهارده زى بكره زى أمبارح بالنسبة له؟
أكيد كل واحد منا ليه حلم بيتمنى يحققه وده طبيعى، بس الموضوع كله فهل أنت بتعمل علشان تحقق الحلم ده ولا لاء؟؟
هل بتحلم حلم قدك ولا أكبر منك ولا أصغر منك فهيبقى سهل تحققه؟
من تجربة شخصية
أوعى تحلم حلم قدك ولا أصغر منك طبعا
خلى حلمك صعب لدرجة أن الناس تفتكر أنك مستحيل أو صعب جدا أنك تحققه
علشان لما تحققه تبقى الفرحة ليها طعم خاص كدة
اتعب علشان تحققه.. مفيش حاجة اسمها صعب لو أنت هتشتغل بجد
خلى حلمك حدوده السما وحاول توصله
احلم حلم بتاعك.. متحلمشى أنك تكون زى حد
حتى لو كان الحد ده هو أكتر واحد ناجح فى الدنيا
احلم تكون أحسن منه
أصلها مش صعبة يعنى.. ده حلم ومش بفلوس فليه متحلمشى؟
احلم تكون نفسك واخلق منطقة ليك الناس تقلدك فيها
اوعاك تقلد حد
احلم واشتغل ومتسمعش من حد يقولك أنت مجنون أو أيه حلمك ده.. ده مستحيل تحققه
دى عالم ضعيفة
احلم وملكش دعوة بحد
وزى ما غاندى قال:
فى البداية يتجاهلونك ثم يسخرون منك ثم يحاربونك ثم تنتصر
خلى دايما حلمك هو بس إلى قدامك.
متخليش أى بنى آدم قدامك.. لأنه زيه زيك.. فلو عايز تحط إنسان قدامك فمن الأولى أنه يكون أنت
حب نفسك لأنها تستحق أنك تحبها
خلى عندك حلم وهدف يستحق أنك تعيش علشانة
متربطش حلمك بتعليمك.. حلمك هتحققه لو أنت مش متعلم أصلا ولا معاك ابتدائية مثلا
بس لو اشتغلت عليه
خليك واثق من نفسك ومتأكد أنك هتحقق حلمك.. خليك متفائل
"تفائلوا بالخير تجدوه"
احلم هتكون حاجة إن شاء الله
أنا حلمى أكون مدير شركة جوجل
صورة ارشيفية
مشاركة
اضف تعليقاً واقرأ تعليقات القراء
مشاركة
