لما يومْ الحد تنزل
افتكر تاخد سلاحك
أصلى يوم الحد هوه
يوم كفاحى يوم كفاحاك
***************
اجعلْ الكلمة سلاحك
اوعى تاخد غيرها شىء
اوعى تحرق اوعى تضرب
دا الدمار ما يفيد بشىء
***************
الدمار هيضر بلدك
راح يأخرها كتير
راح يدمرها وهيه
مصرنا القلب الكبير
***************
ضيَّع الفرصة عليهم
خللى كل الناس تقول
تحيا مصر أصلى مصر
مصر دى بلد الأصول
***************
قول له ياله روح كفاية
روح كفاية فينا فُرقة
روح كفاية وعود كفاية
روح بقينا ألف فِرقة
***************
قول له ياله روح كفاية
ألف فرصة اعطناك
كل مرة تقول عشيرتى
روح كفانا روح كفاك
***************
قول له روح أصلى النهارده
جيت أقول لك ياله روح
واما كل الشعب يهتف
ياله روح .. لازم تروح
***************
روح لأنك لستَ أهلاً
للمكانة دى يا مرسى
دى الحكاية ميش رياسة
مصر ميش قصرين وكرسى
***************
مصرنا دى شىء كبير
شىء جميل مالوش مثيل
فى الكتاب الله ذكرها
مصر أهرام مصر نيل
***************
مصر علم ونور حضاره
قبل ما العالم ينوَّر
يا حبيبى إن كنت ناسى
روح بقى ع الأصل دوَّر
***************
مصر دى فى القلب ساكنة
هيه نبضى فى الحياة
مصر نعمة مصر جنة
مصر شريان الحياة
***************
مصر قرآن مصر مدنة
فوق جبين الدهر درَّة
مصرنا الله أكبر
عمرها مخلوقة حرَّة
***************
مصرنا فيها الكنايس
زيَّها زى الجوامع
أصلى دين الله محبة
حبها للكل جامع
***************
مصرنا الله عليها
مصر شربات مصر حلوة
أصله حلوانى بناها
فى صميم القلب غنوه
***************
ربنا يحفظها مصر
من مكايد من شرور
ربنا يصونك يا مصر
جوهرة كل العصور
***************
صورة أرشيفية
مشاركة
اضف تعليقاً واقرأ تعليقات القراء
مشاركة
