فيسبوك
واتساب
ترس وداير بيحرك فى الترس التانى
خطوه تخطى ..
تهد آثار الخطوة اللى كانت يوم سبقانى
قطر بيدخل جوه محطة
يخلى القطر الواقف يمشى
وقطر بيدخل ..
قطر بيخرج ..
على نغمة نفس الصفارة
وسيجاره تولع لسيجاره
واللى اتنين ينطفوا فى الآخر
أو يترموا على ناصية حارة
والرجلين بتعدى عليهم
تدهسهم وتهد ماضيهم ..
جنب رجول الناس فى الحارة
واد ع الأرض بيلعب حفره
واللعبة أدى بكل بساطة
بليه تزُق البلية التانية
فتجرى أوام وتُقع فى الحفرة
والبليه اللى كانت بتزُق
تستنى اللى هيجى يزُق
وقلب يدُق
يخلى القلب التانى يدُق
وشعر وبُق
وجزمه تلُق
وأى كلام يتقال علشان
أصبح مجنون
وارحل م الكون
وواحد يجى بكل برود
يقولى مكانى
معادش مكانى
اقوم بالذوق
لأنه هيعرف بعد شويه..
سر الدنيا وسر الحفره !!!
