رامى زين يكتب: كحة موظف

النهاردة أول يوم ف شغلى الجديد
صاحى من نومى فايق سعيد
وقلبى من جوايا بيتنطط معايا
يوم تاريخى ف عمرى أكيد
لبست هدومى ونزلت أجرى
النهاردة يومى لازم أروح بدرى
مش ناقصة تأخير ولا ناقصة مدير
من أول يوم يقولى ما بدرى
وصلت شغلى ف معادى تمام
وأول مادخلت رميت السلام
وكل الموظفين اللى كانوا موجودين
ردوا عليّا بكل احترام
سلمت على المدير وباركلى وهنانى
وبعد الترحاب وبعد التهانى
قالى تعالى نقعد ف المكتب
نتكلم شوية عايزك ثوانى
قالى بالنسبه لموضوع المهية
هتقل عن ما قولتلك ف المقابلة الشخصية
وبعد كام شهر هيتغير الأمر
وواحدة واحدة هعليهولك شوية
وقالى كمان كل اللى بيشتغل معانا
لازم يمضى على وصل أمانة
ويا ريت ماتخدش الموضع بحساسية
أنا ما أقصدش أى إهانة
قولتله طيب وبالنسبه للتأمين
على الناس اللى شغالين
قالى ياراجل دى شكليات
وكل ده مجرد روتين
قولتله طيب وبالنسبة للعقد
اللى يضمنلى حقى ساعة الجد
قالى كل اللى شغالين هنا بما فيهم أنا
ماعناش عقود وإسأل أى حد
سألته عن التثبيت قالى ماعدش أصل الغرا شح
وقالى خد بالك أى غلطة ممكن أمشيك فاشتغل صح
سألته هو اللى قبل منى مشى من الشغل ليه
قالى مفيش وهو شغال مرة كح