ننشر قصيدة جديدة للشاعر سعيد شحاتة بعنوان "دُعايا ف بدلتك يحميك".
- عدّي يا قلبي البرّ وانت معاك دُعايا ف بدلتك يحميك
الأمّ قالت لابنها البكري اللي راح للجبهه يستشهد
- اضرب بعزم ما فيك
الأبّ حرّر روح ضناه م الخوف
- ابقى افتكرني ما بين زمايلك وانت بتحارب
البنت قالت للولد والبدله فوق من جتّته زايناه وزايينها
الحرب بتجرّب موازينها
والقلعه بتفرّغ زنازينها
والأرض بتحارب في وسط الخوف بياسمينها الغريب
حطّ الحمام بضوافره فوق الديب
والعندليب غنّى لحبيب رايح يجيب جتة جدع غيره
الطير بيحمي بطلعته طيره
والسبع بيحلّق على بيره
الفجر بيباهي بعصافيره الشجر ويبوح
مسموح نغني واللا مش مسموح ماهيش فارقه
الدمعه نازله بحرقه فوق خدّ الجريد
والعيد ما بيردّش
سدّوا العيال في حاجات ما تنسدّش
دعوات ما تتعدش وربّ كبير
أصوات كتير ع البرّ بتهاتي
والبنت بتقول للولد خطّي كما الفرسان وانا ف ضهرك
والأمّ بتقول للبطل حارب
والأبّ بيقول للربيع عايزك تجيني نهار مُغلّف بالعلم
الحلم مش للي استلم رايه
الحلم للي هيرفع الأسماء على دماغ العدو
للي ابتدوا يصلّوا الغنا بالقصر
للي استعدوا يجيبوا للناس نصر
في الحرب كان بيحبها بقلبه اللي دايس دبابات محتلّ
كان جوّه منه حاجات كتير محتاج يقولها لحد مش شايفه
لكنّه ماشي سلاحه زنهار والعدو خايفه
والله أكبر فوق شفايفه رماح
إصحاح في سورة وسورة من إصحاح
دمّ الأراضي الطاهرة صالح للوضو
اتوضوا قبل الدنيا ما تليّل وهاتوا من العدو أسراه
الله أكبر ع اللي قال ويّاه
قلب الوطن في الجسم نبضه حياه
ضحك الوطن جوّه الوريد عيّل
يا بخت من وقت الميلاد سمّاه ......
يا بخت من شاله ف شيلانه وصلّى بيه الفجر ع الرمله
دقّ البياده مخلّي أعداء الوطن أقزام
طالعه الكتيبه التلّ بالأعلام
والطفل بيقول للجدع ما تخافش
الدنيا مش أوضه وعروسه وعَفْش
الدنيا حرّيه
وبطوله وقت الجدّ مقريّه
.......
رجل الولد بتخطّي فوق الرمل وبتحجل
شايل سلاح ف إيديه كما المنجل
بيحشّ بيه أبدان وخلق وطين
وبيسقي أوصال شهيده بفرحة العايشين
صوت الوطن مُلزم لكل المخلصين
ضرب الرصاص غيّة ولاد الغيط في عركتنا
الدمّ سال شلال في بِرْكتنا
قُوتنا اللي مسروق رَدّه عِترتنا
واد عسكري مؤمن بقوّتنا
مفتون بحق الريحه للرياحين
كاره لصوت الذلّ في المواعين
………
صوت الوطن مُلزم لكل المخلصين
قلب الوطن في الجسم نبضه حياه
يا بخت من باس جبهته وعلاّه
الله على كل اللي قال في المعركه أرضي
............... يا زينة الأراضين
على كلّ واحد شال في شال وردي
.............. الحلم للمساكين
على كل قلب متين طلع من صدر صاحبه وخطّى دبابه
على كلّ فرّة نسر وكتابه
على كل من لفّ الرصاص لزميله جوّه رغيف
ورسم له بضلوعه وملامحه رصيف
واستنى طيف يصرخ في كل المشتاقين
عِدّوا العدا بالضرب فوق الروس
واقروا على أرواح ولادنا (النصر) والرياحين
صوت الوطن مُلزم لكل المخلصين
قلب الوطن شُهدا
عَرَق الشهيد فيهم طرح مدفع وناس وبيوت
صمت الشهيد تغريده للملكوت
فرح الشهيد زغاريت وتوت وكافور
دمّ الشهيد طار ع الديابه نسور
...........
-غنّي على جتّة عدوّك وانت وسط النار
- ادخل بصدرك زيّ ما تكون داخل الجنّه
- ابقى افتكرني هناك إذا اشتد الحصار والحر
طالع ولا في دماغي غير الرايه والساري -
يمكن إذا اتمكّنت أجيكم بالسما ونجومها وبيوتها
وأسمع معاكم صمتها وصوتها
طالع ومش خايف
طالع وحالف ع الكتاب والحلم والنور والقلم
يا ارجع لكم شايل نهار
يا ارجع لكم جتّه ف علم
...........
في الملحمه استطعم نشيده المر
ورسم خلايق في السما بتمرّ
وكتب على الشاهد هنا عضمي
ينفع كمانجات للنشيد الحُر
تم أضافة تعليقك سوف يظهر بعد المراجعة