بالفيديو والصور.. الرئيس يكشف منفذ هجوم الكنيسة البطرسية ويؤكد: محمود شفيق محمد مصطفى انتحارى فجر نفسه.. قبضنا على 3 وسيدة وباقى 2.. السيسى: "مش هانسيب تارنا ولازم الحكومة والبرلمان يتحركوا"

السيسي: محمود شفيق محمد مصطفى انتحارى فجر نفسه... by youm7

شارك الرئيس عبدالفتاح السيسى، فى الجنازة العسكرية، الخاصة بشهداء الكنيسة البطرسية، فى حضور البابا تواضروس، بابا الإسكندرية وبطريرك الكرازة المرقسية، والمهندس شريف إسماعيل، رئيس مجلس الوزراء، والفريق أول صدقى صبحى وزير الدفاع، واللواء مجدى عبد الغفار، وزير الداخلية، وعدد كبير من الوزراء والمسئولين التنفيذيين وكبار رجال الدولة.

وعقب الجنازة العسكرية كشف الرئيس عبد الفتاح السيسىى، اسم منفذ العملية الإرهابية بالكنيسة البطرسية، وقال: "اللى عمل كده علشان تكونوا عارفين شاب دخل الكنيسة اسمه محمود شفيق محمد مصطفى، وفجر نفسه داخل الكنيسة، عنده 22 سنة وقبضنا على 3 وسيدة وناقص اثنين، وإمبارح طول الليل بيطلعوا جثة محمود محمد شفيق مصطفى، اللى عمل العمل ده بحزام ناسف مش بشنطة، والكلام اللى أنا بقوله ده كلام مسئول ماكناش نقدر نيجى ليكم النهاردة".

وأضاف الرئيس السيسى، خلال كلمة أثناء مراسم الجنازة العسكرية، التى أقيمت لشهداء الهجوم الإرهابى، "أنا مش بس بعزى أشقاءنا المسيحيين ولا قداسة البابا تواضروس ولا انتوا، أنا بعزى المصريين، والمصاب ده مصابنا كلنا وكل المصريين، قبل ما أجى هنا كنت متأكد إنى لازم أكون معاكم".

ووجه الرئيس حديثه للبابا تواضروس قائًلا: " الموضوع ده مايكونش ليه ملامح نقدر نرسمها،  لكن الرسائل اللى عاوزين نقولها للمصريين العزاء ده لكل المصريين مش ليكم انتوا بس، ده لينا كلنا والمصاب ده مش مصابكم أنتم بس، ده مصابنا كلنا إحنا قلنا خلاص إحنا حاجة واحدة، واللى بيحصل ده عارفين الإحباط، عارفين اللى غلبوا فى المصريين غلبوا فينا بقالهم 3 سنين عمالين يهزوا فينا يمين وشمال مابنجيش معاهم، يعملوا فى الاقتصاد مافيش فايدة ويعملوا إرهاب مافيش فايدة، وما يحدث كان إحباط، أوعوا تفتكروا غير كدة، ده إحباطهم لأن المصريين حيروهم، الحاجة غالية مافيش فايدة ناخد الرز والسكر مافيش فايدة مانجيبش السياحة مافيش فايدة انتوا مش عاوزين تتحركوا لأه،  وانتوا 75 كنيسة اتدمرت لكم قبل كدا".

وتابع: "لازم تكونوا عارفين كويس قوى إن إحنا أولا مش هانسيب تارنا حتى بعد اللى قبضنا عليهم، وبصراحة بقى الحكومة والبرلمان لازم نتحرك بشكل أكبر من كده لأن الموضوع بتاع القوانين اللى مكبلة علشان نكون أمناء مع بعضنا، والقضاء لن يستطيع مع المسائل دى بالحسم اللازم بالطريقة اللى ماشيين بيها، قوانين تعالج المسائل دى بشكل حاسم، والإرهاب ده بشكل حاسم، وكل من يستهدف المساس بأمننا وأمن بلادنا ويؤذى أولادنا وأحبائنا، لأ مش هاينفع كده، فيه كلام كثير مش بنقوله، انتوا ماتعفرفوش حجم النجاح اللى إحنا محققينه، حتى فى مواجهة الإرهاب.

وأضاف الرئيس :" انتو ماتعرفوش حجم النجاح اللى متحقق فى سيناء، كبيرو قوى، واللى حصل أوعو تقولوا عليه ابدا أنه خلل أمنى من فضلكم ، أنا لو عاوز أريحكم هاعمل حاجات كتيرة، بس إحنا مابنتعاملش كده، إحنا بنتعامل بصدق وأمانة والأمر بيتطلب إيه وبنعمله، واللى حصل ده امبارح ضربة إحباط منهم، ولكن لن يتسطيعوا إحباطنا، طول ما إحنا مع بعض كتلة واحدة وايد واحدة، لازم هاننتصر لأننا أهل خير، مش أهل شر، وأهل بناء مش أهل هدم، أهل تعمير مش أهل  خراب، أهل إصلاح ، مش أهل إفساد عزائى ليكوا كلكم وشعب مصر كله ومش هاقول أبدا اشقائنا المسيحيين لأ والله هاقول عزائنا لكل المصريين وبقول لكل المصريين الضربة دى وجعتنا وسببت ألم كبير لينا لكن أبدا أبدا الضربة دى عمرها ما هتكسرنا وهانقف، وهانبقى أقوياء جدا جدا، كالعادة وهانصمد والحرب دى إن شاء الله هاننجح فيها".

واختتم الرئيس كلمته: أرجوا انكم تقبلوا عزائى قداسة البابا".

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

أشلاء الإرهابى محمود شفيق