إيمان عز الدين تحذر طلاب المرحلة الثانية من التنسيق: آخر موعد لتسجيل وتعديل الرغبات اليوم

قالت الإعلامية إيمان عز الدين، مقدمة برنامج «الستات ما يعرفوش يكدبوا» المذاع عبر قناة CBC، إن اليوم هو الموعد النهائي أمام طلاب المرحلة الثانية من تنسيق الثانوية العامة لتسجيل وتعديل رغباتهم، مشددة على ضرورة الانتهاء من الإجراءات قبل غلق موقع التنسيق.

لا تعديل بعد غلق الموقع

وأضافت: «أول حاجة وقبل أي حاجة، عايزين نقول لكل طلابنا ولادنا من طلاب الثانوية العامة وتحديداً طلاب المرحلة التانية من التنسيق، النهاردة الساعة 7 بليل -زي ما قلنا وأكدنا قبل كدا- النهاردة الساعة 7 بليل إن شاء الله هو الميعاد النهائي لتسجيل وتعديل الرغبات».

وتابعت: «بعدها هيتقفل موقع التنسيق ومش هيكون متاح أي تعديل من أي نوع لأي رغبة».

مراجعة الرغبات قبل الموعد النهائي

وأوضحت أن وزارة التعليم العالي أعلنت فتح باب التسجيل للمرحلة الثانية بحد أدنى 220 درجة للشعبة العلمية و205 درجات للشعبة الأدبية، مطالبة الطلاب الذين لم يسجلوا رغباتهم أو يرغبون في تعديل ترتيبها بسرعة مراجعتها قبل الموعد النهائي.

وقالت: «عشان كدا لو لسة إنتي أو إنت مسجلتوش رغباتكم أو عايزين تعدلوا ترتيبها؛ راجعوا وسجلوا قبل الساعة 7 بليل، واتأكدوا إن كل الرغبات مكتوبة بالترتيب اللي يناسبكم».

تحذير من الانتظار حتى اللحظات الأخيرة

وحذرت إيمان عز الدين الطلاب من تأجيل التسجيل أو تعديل الرغبات حتى الساعات الأخيرة، قائلة: «متستنوش للساعة الأخيرة أو لآخر وقت، محدش عارف إيه اللي يحصل، عايزين نتجنب أي ضغط على الموقع، أي ظرف ممكن يحصل ليكي أو ليك في آخر لحظة».

واختتمت حديثها برسالة تشجيع للطلاب، قائلة: «فالحقوا من دلوقتي اكتبوا وراجعوا وعدلوا، وإن شاء الله ربنا يوفق كل ولادنا وبناتنا».