خالد صلاح

حمدى الغفير يكتب: "حواجب الفامبير وليجن".. ده أنيل أول يوم جامعة ده ولا إيه؟

الثلاثاء، 12 سبتمبر 2017 03:29 م
حمدى الغفير يكتب: "حواجب الفامبير وليجن".. ده أنيل أول يوم جامعة ده ولا إيه؟ حمدى الغفير

صديقاتى الطالبات والطالبات برضه، اللى داخلين لأول مرة الكليات، بعد مبرووك وبالتوفيق وكل كليشيهات الخلاص من مأساة الثانوية العامة، والدخول إلى "شرم الشيخ" التعليم الجامعة واللى منها، وكل أحلام أول يوم الجامعة اللطيفة اللى عشنا على أملها سنين، أنا مش جاى أديكم مواعظ وحكم عشان بس نبقى على نور، أنا جاى أكلمكن فى شوية حاجات عشان تعدى الكام سنة اللى ليكى على خير.

ممكن برضه  الدفعات القديمة يحضرونا عشان نترحم من اللى بنشوفه لأن فى ناس كل ما بتكبر بتتهطل زيادة وده مش عيب، أول حاجة هقولكم عليها "لبس الجامعة" أقسم بالله إن الجامعة للتعليم زى المدرسة بالظبط، ومش معنى إنك قلعتى الجيبة والدريل ومش هتقولى يا مستر إنك تهبى علينا زى الجراد اللى بيطاردنا فجأة بألوان وأشكال احنا مش فاهمين مين اللى اقنعك إنها لبس، دى مكملات يا حبيتى، يعنى مين قال إن المدعو "ليجن" ده بنطلون متاح معاه البادى والتوب والشيميز وكل ما يدعو الشباب لعقد جلسات ندب وولولة على وكستهم مهو يا يتحرش يا ينتحر، ده يا ماما يتلبس ع البحر أو حتى عليه حاجة طويلة، وبعدين مين قال إن قوس قزح موضة، يعنى فهمينى بتجيبى منين قدرة تلبسى كل ألوانه مع بعض بتعمليها ازاى يا قادرة.

كنت هنسى شوية الشعر اللى "مش باينين"، من غير دخول فى الدين وكدة، الحجاب ده بيغطى الشعر والرقبة والودان، وبرضه طرق الزكاة احنا عارفينها كويس لكن رقبة وودان وثلثين شعرك برا والاقيكى بتسألى صاحبتك "الطرحة مظبوطة" يا سلام! دى أحلى مرقعة دى ولا إيه؟! هو لو فى حاجة محتاجة تتظبط فيبقى دماغك اللى صورتلك إن ده حجاب.

كل ده كوووم والورد اللى ملى الشوارع نلاقيه طارح ومفتح أول يوم فى  الجامعة أقسم بالله شم النسيم لسه مجاش وانتى اكيد مش هتعمليلنا شو الدنيا ربيع دلوقتى، بصى بجد انا زهقت من اللبس مش هنرغى بس هقولك ارحمينا يرحمك ربنا..

نيجى بقى للجزء الأهم والأخطر وهو الميكب طبعا من غير المنطقى بالمرة أننا نلاقى أفواج من كائنات الفامبير الممزوجة بتتشات فيلم فجر الإسلام وجايين بحواجب أبو لهب، مش عاوز أفاجئك بس الفيلم كان قاصد يخوف الناس، حواجبك دى ممكن تعمليها فى ذكرى الهولوكوست أو فى الهالووين هتبقى تحفة، لكن الاقيكى كمان بتقولى دى طبيعية لأ دانتى تجيلى بقى عشان أشوهلك وشك وأقولك ده طبيعى.

طيب هقول حاجة كمان عشان الفقع المصرى بتاعنا ماسخ اوووى مش معنى إنك ظبطى خط الاى لاينر المقدس بالنسبالك مرتين إنك تقولى على نفسك ميكب أرتيست، وانتى أصلاً كل خبرتك فى الحياة إن "فيرى اند لافلى" بيفتح ل 14 درجة وشوفى الفرق، فى ايه يعنى واحدة منكن سمت نفسها فاشونيستا والتانية ميكب ارتيست وتلاقى شلة معفنة فاكرة نفسها جاية أسبوع الموضة اللبنانى، داخلة أول يوم فى الدراسة بتقول تعاويذ وتقولك "دى درجة الليلاه" و"لأ ده برايمر بسيط ومعاه تاتش كونتور" و"I’m in love in Baby Blue colore" دانتى ربنا نجاكى من امتحان إنجليزى وناجحة بدرجتين رأفة ومكنتيش عارفة تحلى القطعة كفرتونا يا شيخة..

 عشان تكملى بحلقة فيا بقى، اسمها مكلتش مذاكرتش مفقعتش، لكن مش كلت دى تقوليها وانتى بتسمعى طيور الجنة، بتعملى كدة ليه انتى متخلفة يا حبيبتى؟! ده مش دلع ده أرف والواحد مننا بيبقى عاوز يرجع وعلى فكرة بيبقى لقبك بينه وبين صحابه "شلبى المسهوك"، أو "سمر الأوفر"، وبعدين بتشوفى صاحبتك كل يوم ايه لازمه أم حضن المطارات و600 بوسة وتمسكى وشها وتقوليلها قلبى يا ناس، يعنى انتى عندك أوفر دوز قهر و فقع اعمليه من ورانا لكن ذنبنا ايه نعيش اجواء مهند ونور دى كل يوم كدة، ولو فتحنا الشات بينكم هنلاقى خالتى فرنسا هى اللى بتدير الحوار وبعدين بقيتوا مفقوسين وعارفين انكم بتكرهوا بعض يا روحى بمعنى أصح اتوكسى انتى وهى..

 طيب بالنسبة للحب واللفلفة  لازم تعرفى حاجة فى أول يوم كدة تكراشى على واحد حقك، لكن تكراشى ع الدفعة بمعيدنها ببتاع الورق فى المكتبة لأ ده حتى مش هتقدرى تحفظى أساميهم يا شيخة، يعنى تدخلى المحاضرة تقعدى جنب واحد وتسبلى للدكتور وتكلمى صاحبتك فى الشات على واحد، وترتبطى بواحد رابع تقوليله حبيتك من أول ما شوفتك، طبعا مش لاقى غير كلمة من 3 حروف ممكن تقريها عادى أو معكوسة هتعبر عن اللى جوايا لكن عشان انا مؤدب وانتى كيوت هقولك هأ أ أووووو، عبط يا بت احنا عبط يا قادرة، خلاصة الكلام لمى نفسك واستهدى بالله وبلاش حوارات يا شطورة عشان احنا لسة بنقول يا هادى فى أول يوم..





لا توجد تعليقات على الخبر
اضف تعليق

تم أضافة تعليقك سوف يظهر بعد المراجعة



مشاركتك بالتعليق تعنى أنك قرأت بروتوكول نشر التعليقات على اليوم السابع، وأنك تتحمل المسئولية الأدبية والقانونية عن نشر هذا التعليق بروتوكول نشر التعليقات من اليوم السابع
الرجوع الى أعلى الصفحة