بصوا بقى عايزين تحسوا بالفرح والسعادة والرضا دايما...... الموضوع مش صعب هو بس محتاج حبة تدريب وحبة تفكير ونظرة للى حواليك ..... حفهمكم ...
يعنى مثلا لو حسيتم بالألم دربوا نفسكم على الصبر وده حيحصل لما تبتدى تبص حواليك كويس، وتلاقى إن فيه غيرك بيتألم أكتر منك ساعتها حتحس أن ربنا رحمك برضه إنك أقل ابتلاء منه وحتلاقى نفسك بتصبر على ألمك...
ولو حسيت بالضعف وأن الدنيا قفلت فى وشك فلازم تتعود أن يبقى عندك تحدى وأمل فى الله، وتقوى روحك وده حيحصل لما تبص حواليك وتلاقى ناس فى مستشفى الأمراض العقلية اللى ما قدروش يبقى عندهم إصرار على تحدى المشاكل، والوقوف قصادها، أو كان إيمانهم ضعيف بالله وخاف إنك توصل وتبقى زيهم ....
ولو حسيت بالحزن حاول تسعد نفسك ولو بأبسط الأشياء واتعود إنك تهادى نفسك وتجيبلها هدية ولو بسيطة، وبص حواليك حتلاقى كل واحد عنده اللى يحزنه أكتر منك فعلا، وساعتها حتقول الحمد لله، وحتلاقى نفسك بتبتسم من رحمة ربنا بيك .....
طبق ده على حاجات كتير فى حياتك حتلاقى ناس أقل منك بكتير مهما كنت بتشتكى، بص دايما على اللى أقل منك مش اللى أعلى منك حتحس دائما بالرضا بما قسمه الله لك.
تم أضافة تعليقك سوف يظهر بعد المراجعة