هانى رمزى: "تحية النازية" سبب تهديدى بالسجن فى ألمانيا

أكد هانى رمزى نجم الأهلى ومنتخب مصر السابق، والمدير الفنى الحالى لفريق اتحاد الشرطة، أنه كان سيتعرض للسجن فى ألمانيا وقت احترافه فى صفوف فيردر بريمن، بعد أن قام بتقديم تحية "النازية" لطبيب الفريق.

قال رمزى خلال حواره لبرنامج "الكرة فى دريم" مع خالد الغندور: "كان عندنا حفلة فى النادى، والمفروض أنها مقفولة بس على مجلس الإدارة واللاعبين، وكل واحد بيطلع يقول كلمة، ولما جه الدور على طبيب الفريق وكلنا عارفين أنه عنصرى وميال لنظام النازية وبيحب هتلر، فكلنا صفقنا له، وأنا رحت رافع إيدى وعامل تحية النازية من باب الهزار زى ما بنعملها فى التدريبات".

وأضاف رمزى: "الحفلة عدت وخلاص، وتانى يوم وأنا فى التدريبات لقيت حد من الإدارة طلعنى من التدريب وقالى مدير الكرة عايزك فى مكتب رئيس النادى، لما رحتله قالى: "أنت إمبارح رفعت شعار النازية، وجالنا بلاغ فيك، لأن فى واحد صحفى فى أكبر جريدة كتب أن فريق بريمن بيقيم حفلات نازية داخل جدرانه، وإحنا فى موقف صعب جداً، ولازم تكتب اعتذار وإحنا هنكتب اعتذار رسمى باسم النادى علشان نوضح أنك لا تعلم قانون البلد، ولا تقصد به إهانة أحد، ولا تقصد اتهام الدكتور بالنازية".

وتابع رمزى: "الموقف هزنى، وملعبتش الماتش اللى بعديه، وأهلى فى مصر وقتها اعتقدوا أنى تعرضت للسجن بالفعل.. وكان الموقف ده من الحاجات اللى خلتنى لازم أبقى عارف قانون البلد اللى هقعد فيها".

موضوعات متعلقة

هانى رمزى يشكو " ظلم " الحكام ويطالب بالحيادية للشرطة