علشان العشرة تدوم بين الأزواج.. عشرة عليك وعشرة عليها

العلاقة بين الرجال والنساء دائما ما تكون مليئة بالتفاصيل والخلافات، حيث يرى كل منهم الأمور بطريقته الخاصة، ووجهة نظره المختلفة تماما عن الآخر، وبين تلك الأزمات، عشر جمل وتصرفات يقوم بها كل طرف لو تغيرت ستشكل نقلة فى الحياة وستدعم بقاء العشرة بشكل كبير.

ويوضح إيهاب معوض، المتخصص فى العلاقات بين الرجال والنساء، تلك النقاط ويقول، فى البداية للرجال:
1 – لو اصطحبتها لخروجة لا تتبعها بالذل والنكد فتعود وهى تبكى.
2- حيلة أن تأخذ الهاتف معك إلى الحمام بحجة أنك فى انتظار مكالمة مهمة أصبحت مهروسة للغاية.
3-بعد عودتك من العمل لا تستخدم أبدا عبارة "أنتِ قاعدة بتعملى إيه طول الوقت ده"؟.
4- لا تجلس بجوارها على البحر وكرشك ممدود مترين أمامك وشعرك منكوش وتقول لها فى النهاية "شايفة الستات"؟!.
0- لو اكتشفت الموبايل السرى الخاص بك فى السيارة اعترف على الفور وتخلى عن البجاحة.
6 – تخلى عن جملتين يثيرون عصبيتها وهم "أنتم بتودوا الفلوس فين؟" و"أومال أنا بعمل كل ده عشان مين".
7 - بلاش تعمل أكونت سرى لأنها هتجيبك هتجيبك "كل النساء على اتصال بمارك شخصيا".
8- لما تطبخ ليك أكلة كويسة ابتسم وقولها تسلم إيديك.
9- لما تلاقيها عاملة لوك جديد "قصة شعر - لون شعر - عدسات عيون - لابسة حاجة جديدة" حاول تركز وتبدى إعجابك عشان الإحباط.
10- مش كل ما طفل من أولادك يعمل حاجة غلط تقولها "آدى تربيتك يا هانم" على أساس أن سيادتك عابر سبيل.

ثانيا عزيزتى المرأة، تخلصى الآن من هذه العبارات الـ10 لتصبحين امرأة جميلة وجديرة بشريك حياتك:
- مخنوقة.
- مش طايقة أكلم حد.
-اتخنقت من كل حاجة.
- بتخانق مع دبان وشى.
- أخفى من وشى الساعة دى.
- الواحد زهق من كل حاجة.
- سيبنى فى حالى دلوقتى.
- المركب اللى تودى.
- ربنا ياخدنى من وشكوا.
- عفاريت الدنيا بتتنطط قدامى.