س: ما اسمك؟
ج: إلهام عيد عوض ربة منزل ومقيمة فيصل الجيزة
س: ما طبيعة علاقتك بالمتهم أسامة محمد عثمان؟
ج: أنا كنت متجوزاه من سنة 93 وفضلنا متجوزين لغاية ما انفصلنا فى شهر رمضان من عام 2012 من حوالى سنة رافعة عليه قضية خلع.
س: وما سبب انفصالك عن المتهم سالف الذكر؟
ج: عشان أنا كنت مستحرمه الشغل معاه فى الدار لأنه بياخد فلوس لحسابه ومكنتش برضى أمضى له على الشيكات بتاعت الدار لانى كنت أمينة الصندوق ومن ساعتها حصلت بينا مشاكل كتير وحصلت بينا وحصلت انى رفعت عليه قضية خلع لأنه رافض يطلقنى.
س: ما طبيعة عملك بالدار محل التحقيق؟
ج: أنا أمينة الصندوق بالدار.
س: منذ متى وانتى تعملى بتلك الوظيفة؟
ج: من ساعة إنشاء الدار فى عام 2006
س: ومن القائمين على التراخيص بإنشائها؟
ج: أنا وأسامة محمد عثمان رئيس مجلس الادارة ووالدته حميدة محمد حسين نائب رئيس مجلس الإدارة ومعايا فى أمانة الصندوق.
س: ومن القائمون على إدارة الدار فى الوقت الحالى؟
ج: أسامة ومنى محمد سيد مديرة الدار وهى بقالها فى الدار حوالى سنة.
س: ومن يعاون سالفة الذكر بالعمل فى الدار؟
ج: هو المفروض يكون فى ست مرابيات وسواق ومندوب وطباخة وعاملة نظافة وأمينة مخزن ولكن اللى بيبقى موجود فى الدار ساعات مربية وبتمشى على طول ما بتكملش شهر عشان محدش بيديها مرتب وبناتى هما اللى بيباتوا مع الأطفال طول الليل.
س: وملك من تلك الدار؟
ج: دول شقتين مفتوحين على بعض إيجار قانون جديد.
س: وما المقابل المادى نظير إيجار تلك الدار؟
ج: أول خمس سنين كان 2500 جنيه وبعد ما جددوا لينا خمس سنين تانى بقى الإيجار 2800 جنيه.
س: وما مدى صدور ثمة تراخيص من الجهات المختصة بإنشاء تلك الدار؟
ج: أيوة الدار مرخص.
س: وهل لديك ما يثبت ذلك؟
ج: هو كل ورق للدار مع أسامة وانا معايا صورة من قرار الإشهار للدار وصورة من التراخيص.
س: وما عدد الأطفال الذين يحتضنهم الدار؟
ج: هما فى الوقت الحالى 14 طفلا منهم 11 بنت وثلاث صبيان.
وعرض مجرى التحقيق وممثل النيابة العامة الفيديو المثبت بأصل التحقيقات على زوجة المتهم أثناء مثولها أمام النيابة لسماع أقوالها.
س: من القائم على تسجيل ذلك المقطع المعروض عليك سلفا؟
ج: أنا اللى سجلته بأعجوبة.
س: ومتى قمتى بتسجيله ومناسبة تواجدك آنذاك؟
ج: أنا سجلته من حوالى سنة قبل رمضان بحاجات بسيطة لما كنت جايبة حاجات للدار.
س: وأين قمت بتسجيله؟
ج: فى الدار.
س: ولم قمت بتسجيل ذلك المقطع السابق عرضه عليك؟
ج: لأن هو كان بيسىء معاملة الأطفال باستمرار ولما كنت بقول له حرام الولاد دول هتتحاسب عليهم كنت كمان بتضرب عشانهم.
س: ومنذ متى تحديدا وبحوزتك المقاطع السابق عرضها علينا؟
ج: هو المقطع الأول اللى اديته لسعيد وتم إثباته فى المحضر ده بقاله سنة معايا قبل ما امشى من البيت أما المقاطع الأخرى بقالها معايا ست شهور.
س: ومتى تحديدا قمت بتسليم المقطع الأول للمذكور سعيد إسماعيل والذى قام بالإبلاغ؟
ج: أنا اديت المقطع الأول له بداية شهر رمضان اللى فات.
س: قررتى سلفا بتسجيلك لمقطع الفيديو المعروض عليكى سلفا منذ عام مضى فلماذا لم تبلغى فى حينها؟
ج: عشان أنا كنت خايفة منه وكمان عشان أنا كنت عايزة اجهز ليهم مكان وارخصه واخدهم وهو دا السبب اللى اخرنى وكمان كان بيهدونى انه يرمى مية نار فى وشى، وانا كنت عايزة اجمع مقاطع اكتر عشان اثبت ضرب الأطفال وانه بيستغل الأطفال.
س: هل قمتى بإبلاغ أى من الجهات المعنية عما بدر من المتهم؟ وما هى تلك الجهات؟
ج: أيوة، أنا بلغت منذ ثلاث شهور الاستاذ محمد توفيق لبنة وده بيشغل منصب مدير عام الجمعيات الأهلية بإدارة الجمعيات بالعجوزة.
س: وما أفعال التعدى التى وقعت من المتهم أسامة محمد قبل الأطفال نزلاء الدار؟
ج: هو كان بيضربهم بالعصاية على جسمهم وكان بيضربهم ساعات بالشلوت.
س: ولما كان تعدى المتهم على الأطفال نزلاء الدار؟
ج: هو كان أول ما بيرجع من بره يشغل الجهاز ويشوف الكاميرات سجلت إيه ويجمع كل الأولاد اللى عملوا حاجه يعنى اللى فتح الثلاجة واللى شغل التليفزيون ويقعد يضرب فيهم لأنه مانع الأولاد يفتحوا الثلاجة أو يتفرجوا على التليفزيون ولا يلعبوا.
س: وما مدى اعتياد المتهم سالف الذكر بإتيان تلك الأفعال قبل الأطفال نزلاء الدار؟
ج: هو متعود يضربهم.
س: ومن هم الأطفال الذين قام المتهم بالتعدى عليهم ضربا؟
ج: اللى فى الفيديو الأولانية مشيرة والتانية إلهام وثالث واحد ولد اسمه نور الدين والرابعة داليا والخامس طارق والسادس أدهم وآخر واحد هيثم وفى أوقات تانى ضرب شهد ودنيا وداليا.
س: وما كان قصده من التعدى على المجنى عليهم على ذلك النحو؟
ج: معرفش.
س: وما مدى مشاهدتك لثمة وقائع تعدٍ أخرى من قبل المتهم على الأطفال نزلاء الدار؟
ج: أيوة وكمان ولادى كانوا بيحكولى
س: ما علاقتك بالمدعو سعيد إسماعيل؟
ج: أنا بداية معرفتى بسعيد لما شفته فى المدرسة وكان بيدفع مصاريف الأولاد بتوع المدارس وساعتها سملت عليه وقلى إنه كان بيجى الدار كتير وأنه متبرع للدار.
س: قررتى سلفا بمشاهدتك للمتهم حال تعديه على الأطفال نزلاء الدار من ذى قبل فمتى كان ذلك؟
ج: قبلها بحوالى شهرين ثلاثة.
س: وما هى كيفية ذلك التصدى فى تلك المرة؟
ج: هو اللى حصل ساعتها أن فيه طفل اسمه ياسر مد ايده على الأكل قبل من زمايله فقام ضربه بالكوتشى فى وشه ووقعه على ضهره.
س: وما مدى مشاركة آخرين ممن عملوا بالدار فى التعدى على الأطفال؟
ج: لا هو بس اللى بيضربهم.
وبسماع أقوال مدير الدار منى محمد سيد أنكرت علمها بتعدى المتهم على الأطفال وأكدت أن الجمعية كان عليها إشراف من قبل وزارة التضامن على النواحى المالية والإدارية والتبرعات كانت تسجل بدفاتر الدار وإلى نص التحقيق.
س: ما قولك فيما هو منسوب إليك من أنك متهمة بالعلم بوقوع جريمة الضرب وإعانة المتهم أسامة محمد عثمان على الفرار من وجه القضاء والعدالة بأن قمت بإخفاء وقوع الجريمة مع علمك بذلك؟
ج: محصلش وانا عمرى ما شوفته بيضرب الأطفال ولا حد بلغنى بكده.
س: ما هى طبيعة عملك تحديدا؟
ج: أنا مديرة دار أيتام مكة المكرمة.
س: منذ متى وأنت تباشرى وتشغلين تلك الوظيفة، وهل يشاركك ثمة أحد فى شغل الوظيفة؟
ج: من أول يوليو 2014، ولم يشاركنى أحد.
س: وهل كنت تشغلين ثمة وظيفة بذات الدار قبل توليك المنصب؟
ج: أنا اشتغلت اخصائية اجتماعية لمدة شهر واحد فى الدار.
س: وما هو المؤهل العلمى الخاص بك؟
ج: ليسانس حقوق.
س: وما هى صلة المؤهل الخاص بتوليك وظيفة اخصائية اجتماعية أو منصب مديرة الدار؟
ج: أنا كنت بقرأ بخصوص سلوك الأطفال عشان اقدر اتولى المهام دى.
س: وما هى اختصاصاتك الوظيفية تحديدا؟
ج: أنا مسئولة عن كل حاجه فى الدار واختصاصى الأكثر متعلق بالمسائل المالية المتعلقة بالتبرعات وأيضا الإشراف على الموظفين الموجودين بالدار وأداء مهامهم.
س: وهل يشاركك ثمة أشخاص فى الاختصاص؟
ج: لا بس أنا بتابع اعمالى وبيشرف عليها الأستاذ أسامة بصفته رئيس مجلس الإدارة.
س: هل أنت على علم بكيفية إشهار الجمعية محل عملك؟
ج: لا لأن أنا جيت بقالى حوالى شهرين بس.
س: وما هى مصادر تمويل الجمعية والدار محل عملك تحديدا؟
ج: أنا معرفش أن كان بتاخد فلوس من الدولة ولا لا بس اللى اعرفه انها بتيجى لها كفالات وتبرعات من الناس بس.
س: وما هى أنواع التبرعات التى ترد لدار الأيتام والجمعية من الأهالى؟
ج: فى تبرعات نقدية ودى بتتقسم لتبرعات نقدية وكفالات وفيه تبرعات عينية ودى عبارة عن لعب أطفال وملابس ومأكولات للدار.
س: وهل يوجد سجلات أو دفاتر خاصة بالأعمال الإدارية والمالية للدار؟
ج: ايوة.
س: وما هى أنواع الدفاتر والسجلات؟
ج: هو فيه دفتر أخصائى اجتماعى ودفتر تعليمى ودول متوليهم الاخصائى الاجتماعى وفيه دفتر إشراف نهارى وده بيتولاها الأخصائية الاجتماعية أو أنا بنفسى ودفتر إشراف ليلى بيتولاه المربيات وفيه السجل ودفاتر بتولاه أنا وسجل طبيب وده بيتم إتيانه لحالات مرضية للأطفال ودفتر لخروجهم وسجل التبرعات النقدية والعينية وكل دول أنا ماسكاهم.
س: وهل يوجد إشراف من قبل أى من جهات الدولة على الأعمال المالية والإدارية للدار وما هى تلك الجهات؟
ج: ايوة إدارة الأسرة والطفولة وإدارة الجمعيات.
نص أقوال زوجة المتهم
أخبار متعلقة..
ننشر نص أقوال المتهم بتعذيب أطفال دار أيتام مكة: كنت بعاملهم زى أبوهم.. وقت الأجازة بخرجهم ووقت الغلط بعاقبهم.. انفصلت عن زوجتى لأنها كانت بتشرب شيشة وسرقتنى.. وحررت ضدها محضر زنا
تم أضافة تعليقك سوف يظهر بعد المراجعة