"علشان كل الممنوع مرغوب، وعلشان الأهل بيرفضوا فكرة الترفيه أثناء الامتحانات رغم أهميتها، وعلشان بنعتبر الثانوية العامة انتحار مش مرحلة لازم تتعاش بحلوها ومرها" أطلقت "تقى أحمد" الطالبة فى الثانوية العامة دعوتها على "فيس بوك" لتفتح نافذة من الأحلام والبراح لأصدقائها من الطلاب، وحتى أولئك الذين لا تعرفهم ولكنها تعيش معاناتهم نفسها، وهم بدورهم سرعان ما استجابوا وامتلأت الدعوة بالأمنيات البسيطة تارة والكبيرة تارة أخرى، ولكنها فى الحالتين "أحلام مع وقف التنفيذ" بسبب امتحانات الثانوية.
وتقول "تقى" لـ"اليوم السابع"، "الطلبة كلها مضغوطة وعندها أحلام ونفسها تعمل حاجات كتير بس مافيش وقت، وحتى لو فى وقت الأهل بيمنعوهم لأنهم رافضين فكرة الترفيه أثناء الامتحانات، فقررت أطرح مساحة للتعبير عن أمنياتنا وأحلامنا التى نتمنى تنفيذها فور الانتهاء من امتحانات الثانوية العامة".
"هتطوع فى مويك ورسالة، وهتعلم شغل الهندسة من والدى لأنى ناوية أدخل كلية هندسة، وهلتفت شوية لشغلى التطوعى اللى أهملته، بسبب الدراسة" هكذا لخصت "تقى" أحلامها التى ستبدأ تنفيذها فور الانتهاء من الامتحانات، بينما عبر مشاركون آخرون عن أحلامهم قائلين "هخرج كل يوم مع أصحابى، وأسافر كل حتة ما رحتهاش قبل كده"، "هعمل عمرة وحج وأشارك فى جمعية رسالة"، "هطلع رخصة، وهتابع كل مسلسلات رمضان"، "هنام لمدة سنتين علشان أعوض قلة النوم والقلق والتعب اللى عشتهم فى الثانوية".
بينما عبر آخرون عن تخوفهم من تكرار سيناريو العام الماضى والحرمان من الإجازة بسبب عدم الاستقرار فكتبوا "بعد الامتحانات مش هنعمل حاجة علشان حظر التجوال هيبتدى".
تم أضافة تعليقك سوف يظهر بعد المراجعة