لوازم رمضان بطعم السيسى وكل زبون ومقدرته.. بلح السيسى بـ20 جنيها للكيلو.. والثورة بـ7.5 ومرسى بـ3 جنيهات.. وتاجر: الناس شكلها بقى أحسن ومستبشرة بالعهد الجديد

"السيسى، وعدلى منصور، والثورة، و25 يناير، والشعب، وبشرة خير"، عندما تمتزج السياسة بالبلح تكون هذه هى النتيجة، فهذه الأسماء تحولت الآن من أسماء لرموز أو أغانٍ سياسية، لأسماء أنواع البلح الرمضانى المختلفة لهذا العام، ليصبح الياميش والبلح بطعم السياسة وكل نوع وله ثمنه، وكل زبون ومقدرته.

وتربع "بلح السيسى" على عرش أفخر أنواع البلح وأغلاه، ويتراوح سعره بين 20 و16 جنيها، وأقبل عليه المشترون تحت شعار "الغالى ثمنه فيه"، بينما احتل "بلح عدلى منصور" المرتبة الثانية من حيث السعر والإقبال، وكان "بلح الثورة" هو البلح الشعبى فى المركز الثالث، بينما عرض بعض التجار "بلح مرسى" كأردأ أنواع البلح، وبالرغم من رخص ثمنه فلم يجدوا له سوقا.

"بلح السيسى لو بعناه بـ50 جنيها برضو مش هيفضل ولا بلحة"، هكذا بدأ "محمد إبراهيم"، بائع ياميش رمضان بمنطقة السيدة زينب، حديثة واصفا مدى إقبال المشترين على بلح السيسى، متابعا "بلح السيسى بـ20 جنيها والناس بتشترى بالعشرة كيلو مابيهمهاش، ورغم إن بلح مرسى بـ3 جنيهات مفيش مخلوق بيحاول حتى ياخد بلحة ببلاش".

ويتابع "احنا كتجار نقينا أسوأ الأنواع اللى عارفين أنها مش هتتباع واللى بتبقى بواقى وحطينا عليها أرخص سعر للبلح مش بغرض البيع إنما بس للمقارنة بينها وبين بلح السيسى وعدلى منصور".

وتابع: اخترنا بلح الثورة والشعب و25 يناير علشان يكون بلح شعبى ما يتعداش سعره 7.5 جنيه، وفعلا الناس البسيطة بتقبل على شرائه بشكل كبير.

وعلى الجانب الآخر تقول "ليلى عباس" إحدى المشتريات: بلح السيسى ده لو بـ50 جنيها هنشتريه، هو وعدلى منصور والثورة والشعب، إنما مرسى ده لو حيدهونى ببلاش مش عايزاه، ده نحس واحنا داخلين على أيام مفترجة مش ناقصين ناكله ونتسمم.

ويقول عبده مصطفى، صاحب محل عطارة بالجيزة "الحمد لله السنة دى غير السنة اللى فاتت واللى قبلها فى الإقبال على الشراء والبركة فى السيسى، أى سعر بنحطه على بلح ونكتب يافطة السيسى بيتباع على طول، خاصة أن الجيزة منطقة شعبية، وحاولنا أن نرضى الناس ونخفف عليهم فعملنا سيسى 1 بـ20 جنيها، وسيسى 2 بـ10 جنيهات، وجميع الأنواع اتباعت حتى لو الزبون اشترى كمية صغيرة بيبقى مبسوط وراضى"، وأشار عبده أنه لاحظ أن "وجوه الناس متغيرة للأحسن ومستبشرة بالعهد الجديد وربنا يتمم للمصريين على خير بحق هذه الأيام المفترجة، بس علينا أننا نحترم القانون ونمشى عدل".