أحمد ماهر من "طرة": مش هاعصر لمون تانى ومش هانتخب "صباحى"

أرسل أحمد ماهر مؤسس حركة شباب 6 أبريل، رسالة من محبسه بسجن "طرة" بعنوان "أنا مش هاعصر لمون تانى"، مؤكدا فيها رفضه العملية الانتخابية برمتها ونيته عدم اختيار أى مرشح رئاسى للمرحلة القادمة، لافتا إلى أن حمدين صباحى، ليس مرشح الثورة، ولن يدافع عن حقوق المحبوسين على ذمة قانون التظاهر .

كما شدد "ماهر" فى رسالته لـ"6 أبريل"، أنه لا يستبعد عدم دفاع "صباحى" عن الحريات، قائلا "عصرت ليمون قبل كده فى 2012 ولسه بعانى من ده لغاية دلوقتى، ناس كتير لغاية النهارده بتحملنى مسئولية حكم الإخوان وفوزهم فى انتخابات الرئاسة لأنى دعيت لعصر الليمون قبل الجولة الثانية فى الانتخابات، لما كانت الإعادة بين مرسى وشفيق، رغم إنى مصمم على تحميل المسئولية لمرشحى الرئاسة المحسوبين على الثورة وأبرزهم أبو الفتوح وصباحى لأنهما بترشحهما ضد بعض قسموا أصوات الثورة، مما أدى إلى أن الجولة الثانية تكون بين مرسى وشفيق".

وقال "مؤسس 6 أبريل": "أنا بقى قررت أقاطع انتخابات الرئاسة من أولها، ومش هادعم مرشح وآجى فى الإعادة أقاطع، ومش هاعصر ليمون تانى لا دلوقتى ولا بعد كده، الأيام دى فيه أصدقاء محترمون بيكلمونى على ضرورة عصير الليمون ودعم حمدين صباحى فى انتخابات الرئاسة ضد "السيسى"، وإن حمدين صباحى ممكن يخوض معركة قوية من أجل دعم فكرة الدولة المدنية ومساندة المحبوسين والتذكير بأهداف الثورة".

وأضاف: "البعض ممكن يستغرب ويقول يعنى أنت عصرت لمون ودعمت الفاشيين باسم الدين فى 2012 ومش عايز تعصر لمون وتدعم حمدين دلوقتى، أقولك آه، خلاص توبنا وبطلنا ندعم فاشيين، وزى ما الإخوان عملوا واعتدوا على معارضينهم لا أستبعد أن يقوم "أنصار حمدين" بقتلنا فى الشوارع وسحل كل من يعارضه وسيتم اتهامه بالخيانة والعمالة، وزى ما شوفنا أبرز أنصاره بيخونونا من سنين بدون اعتراض منه، خصوصاً أن مشروع حمدين هو نفس المشروع اللى بيتكلم عن الدولة الشاكمة التى ليس بها مكان للمعارضة، وبالممارسة شوفنا التخوين والسب والقذف والاتهامات بالعمالة والتمويل".
وأشار "ماهر" إلى أنه يدعم حق صباحى فى الترشح للرئاسة وعدم تخوينه".