خالد صلاح

مَحَلكْ سِـــــــــــر قصيدة لــ"أشرف الشافعي"

الثلاثاء، 12 نوفمبر 2013 11:25 م
مَحَلكْ  سِـــــــــــر قصيدة لــ"أشرف الشافعي" أشرف الشافعى

مشاركة

اضف تعليقاً واقرأ تعليقات القراء
مقـَـدِم رِجْــــل بس مِأخـــر التـانيــة
يجوز قلقان يجوز محتـار منين أبـدأ
باغيَر رأييى عشرين مرة ف الثانية
ولا فكــرت مــــرة اطلع من الخَندق
داخوف ولازيادة حِرص مش عارف
بتبقى الســــكة قــــدامى ومش شايف
وعمــالة الفــرص بتضيع وانا واقف
من الدهشــة لا انا مكدب ولا مصدق

ومش فاكر بإنى غــامرت ولا مـــرة
باقول هابدأ وبارجع تانى أعيـد تفكير
واخــدها بالشبه .. وعـايشها من بـرة
وباستغـرب واقول إزاى مافيش تغيير
بأجل حلمى واستنى الفـــرج مايجيش
وباحسب خطوتى جدا لكن ما امشيش
وباحلم تبقى صورتى ماليـة كل أفيش
وانا لا تعبت لجـل اوصـل ولاباعرق

وباتعلق مــع أملى ف حبــــال دايبـــة
وبالعن بختى وانا واقع ورافض اقـوم
ومستسلم لدوامـــة ســـــراب خـــايبـة
وانا ع البـــر لسـه ماابتديتش العْــــوم
بالوم ع الحظ ومالومتش ضباب شوفى
وســـادد أى طـــاقة نـــور تزيح خوفى
ومن باب لاحتياط باعتب على ظروفى
وباتعلق ف قشــــة وَهْــم وانا باغـــرق !

مشاركة

اضف تعليقاً واقرأ تعليقات القراء


لا توجد تعليقات على الخبر
اضف تعليق

تم أضافة تعليقك سوف يظهر بعد المراجعة





لا تفوتك
الرجوع الى أعلى الصفحة