"اللى بنى مصر كان فى الأصل حقـــانى".. قصيدة لـ"أشرف الشافعى"

اللى بنى مصر كان فى الأصل حقـــاني
لا عمره كان سلفى ولا حتى إخــــواني
ولا جـــــدره ليبرالى ولا أصله علماني
صاين حقوق الناس عارف حــدود ربه
وولاده من بعـــده على منهجـــه إتربوا
كان حتى طوب الأرض يشهد له ويحبه
لا لجاه ولا سلطان كان عمره شهـوانى

اللى بنى مصر كان ف الاصل واد عِترة
عمــــره مـــامد إيديــــه لعباية ولاغُترة
وكرامته كــات زاده وعِـزُه كـان سُترة
عمّــر بلاد الله وخــلق كيـــان ووجـــود
علّــم ولاد العـــرب معنى الكــرم والجود
وان قـل يوم مـاله خيره تلاقيــه موجـود
أصل الحضـارة ضميرمش ثروة بالكُترة

اللى بنى مصر كان ف الأصل واد مجـدع
يفهم ف معنى الشرف لا يخون ولا يخدع
فنان يمــوت ف الغنـا وف الصـلا يخشع
بإيديه رســــــــم سكته وخــــط دستـوره
شال البلد ف عينيه .. خلـدها ف سطوره
لا اتغـــر ولا كوش ولا علاّ يـوم ســوره
خده لناسه مداس وحضنه كـــان مخـدع

اللى بنى مصر كان عالـــــم وكان منشد
ف الحق زى السيف وعشانه كان يحشد
طيب مع المظلــوم ومع اللى ظلمه يشــد
فـــلاح يحـب الغيـط وف ورشته أسـطى
ولو ســـألته يقـول أهى ماشية وألاسطة
بينه وبين ربه ماكـــانش فيــــه واسطـة
لا خليــه وجمــاعة ولا مُلا ولا مرشـــد
اللى بنى مصر .