توفيق المصرى يكتب: صوابعى مش زى صوابعك.. وصوابعك مش زى بعضها

صوابعى مش زى بعضها.. وصوابعك كمان.. صوابعى وصوابعك مش زى بعضهم لكن صوابعى تحمل بصمتى تحدد كينونتى..الصوابع مقاسات، طويل قصير تخين رفيع، كل صابع له شكل وعمل كمان. كبار صغار بنات وكمان صبيان.

دى صوابع فنان ودى صاحبها لازم يكون جراح. أما دى فخمسة وخميسة فى عين العدو اللهم لا حسد.. ملوك وصعاليك ولكل إشارة معنى ممكن يكون أقوى من الصوت. إبهام الملك لفوق.. حياة ولتحت.. موت. إبهام الأمى بصمة.. السبابة أمر أو إشارة أو اتهام.. ولما يشير إنسان لآخر باتهام تتجه الأربعة الأخرى ناحية الإنسان.

البنصر يحمل طوق الحب خطوبة فى اليمين وزواج إن كان فى الشمال. الأوسط قد يكون الأطول ولكن دوره متفرج يتطلع باستمرار، أما الخنصر فعناقه مع الآخرين خصام قد يكون الأصغر ولكن ترتاح عليه كل الأصابع.

تنضم أصابعى، تنضم سويا فتكون قوية. ترتقع تهتف.. تهدد.. تتوعد.. تلكم.