كورنيش النيل ومسكة الإيدين
ضحكة تحت مطرة و كأن مفيش غيرنا على الأرض
و تعهدات على الوفا
و ليلة جامدة سموها ليلة العمر
دخلنا بيتنا شابكين ايدينا ضفيرة
و مهما حصل لا ممكن يفرقنا
و مفيش كام يوم عسل خلصوا
سابت ايدينا
التفتنا ورا لقينا عشه حبنا
لقينا عشة حبنا بقت قفص حابس كل امانينا
إيه اللى حصل و إيه جرى
مين يرد ومين يجيب دفاتر قديمة ترجع تاني تتقرا
رسايل غرام و عشق و هيام
وحشتيني بحبك مش قادر على بعدك إمتى ييجي اليوم و ابقى جنبك
كلام كتير اتقال والقمر يشهد
دقات قلبي اللى خلصوا تشهد
ولو جبنا جيرانا هايشهدوا بلمعة عينيك
نور عنيا وحاجه حلوة متغيرة احلوتي يا بنت
آه لما القلب بيتملي بيطرح على الخدود ورد
بس اللى حصل ان إيدينا اتفكت
واحد كبر و التاني سبت
سبت مكانه عدت سنين عمره و خلص زمانه
وهو لسه في مكانه
كل الي كان بيتعمل زمان سوا بقى كل واحد في لوحده
مبقاش في شركه بقت تبادل منفعة
شوف عاوز ايه وهتاخد ايه و مشي حالك
كلها ماشية كدة
بصيت حواليا أدور علي عصفورين كناريا
ملقتش غير صور و ضحكه ماسخة
من بره القلب طالعة
ضحكة عارفاها كويس اصلي ياما ضحكتها
ليه عشنا بقى قفص
و ليه حبنا جوانا اتحبس
إزاي هانرجع شبكة ايدينا
إنت حاضن موبايلك
و بين إيديا كوباية نسكافيه دافية
بقت احن على من حاجات طلبتها و غابت شوية
لا بقى كلام يتقال و حتى الحاجات الي تضحك بقت متضحكش
مبقاش قفص بقى كهف
فى حاجات بتروح و مهما استنيناها مبترجعش
تم أضافة تعليقك سوف يظهر بعد المراجعة