خالد صلاح

راندا جاد تكتب : كيف تكونى مُزة ؟!

الجمعة، 19 يناير 2018 04:00 م
راندا جاد تكتب : كيف تكونى مُزة ؟! فتاة - صورة ارشيفية




إضافة تعليق

فكرت ازاى ابقى مزة زى الموزز اللى كل شوية الاقى صورها على الفسبووك مع تعليقات الذكور اللى بتتحسر على حظها بمقولة : مش الغفر اللى عندنا !!!!

اذن !! انا غفر كما بالتعليقات، اذن !! أن الأوان للغفر أن تتحول إلى مزة فلنبدأ الخطة . الجهنمية بتوفيق من الله ....

طيب أبدأ منين !!

فكرت بذكائى الشديد ابدأ بأسهل مكان وهو اليدين . يا سلام على الايد يادوب هم خمس صوابع، وفتحت النت على الاعتناء باليدين، سهلة .. هى مشوار للكوافير ومانيكور على باديكور وصباح الموزز .

تم المراد وبقيت مزة من أيدى بس، يا جمالى يا جمالى فعلا انا كنت ناسية نفسى من زمان .

-          مامى انا جعان

-          حبيب قلب مامى من جوة انا ايدى حتبوظ من المياة والصابون انا قلبت مزة خلاص ومش حبوظ ايدى  

-          حبيبى كلم بابى خلية يجيب اكل جاهز من برة

وقررت علشان احافظ على نعومة أيدى وشكلها الجميل انى اقاطع المطبخ تماما الا فى أضيق الحدود واستمر الحال دة لمدة عشرين ........ دقيقة، طبعا بابى رفض يجيب اكل جاهز واضطريت ادخل المطبخ واعمل الأكل و اغسل المواعين واتقشر المانيكور وضاع حلم ايد الموزة.

قررت أغير المكان اللى حبدأ منة المزازة، لازم أبدأ صح حعمل رجيم وألعب جيم، انا فعلا لازم ابقى رشيقة زى ممثلات السينما، جسم مشدود، مرونة ورشاقة .

حجزت الجيم تلات ايام فى الاسبوع، اول يوم بابى قعد مع الأولاد، لما رجعت تقريبا كان فية حرب عالمية تالتة فى البيت أو غالبا كان فية حالة خروج من مجاعة او كان فية فأر ميت فى البيت .

المجهود اللى بذلتة فى ارجاع الامور إلى نصابها هو جيم فى حد ذاتة . المزازة مش جيم، لازم نفكر صح .

قررت اضرب فرامل واغير الطريق، الشعر يا جماعة هو تاج المرأة، يعنى إلبسى التاج واتمززى براحتك .

رحت للدكتورة ...... ممكن تكتبيلى فيتامينات للشعر عاوزة ابقى مزة .......

-مزة اية يا بنتى ... دة انت محتاجة عمرة فى صحتك  ... عندك انيميا خدى فيتامينات وحديد ... عندك هشاشة عظام خدى كالسيوم و فيتامين د .... جلدك محتاج فيتامين أ ....

-من اية كل دة يا دكتورة ... من الحمل والولادة والرضاعة مخدتيش فيتامينات يا فالحه .

اشتريت الأدوية وروحت البيت وعديت على بتاع اللب الأسمر، اشتريت قرطاسين لب علشان اقزقز و امدد رجلى امام التليفزيون، اكتشفت اخيرا أن راحة الجسم تبدا من القدمين وانك تبقى مزة جوة نفسك احسن كتير جدا من المزة اللى بيشاوروا عليها الذكور و اللى بيتفرجوا عليها الناس .

خذى نصيحتى وانسى حلم المزة واهتمى بنفسك جوة بيتك وارضى عن شكلك لانك جواكى مزة مدفونة طلعيها لنفسك، واعملى اللى عليكى وملكيش دعوة لو جوزك بيبص لأى مزة .  

 


إضافة تعليق



التعليقات 3

عدد الردود 0

بواسطة:

Dr. Nessim

حلوه قوي المقاله. استمري

استمري ف الكتابه

عدد الردود 0

بواسطة:

خالد عبد الجواد

كلمة حق اريد بها باطل

واعملى اللى عليكى وملكيش دعوة لو جوزك بيبص لأى مزة .

عدد الردود 0

بواسطة:

الحكيم

رجاحه العقل موزز ما بعدها مزه

يا سلام لو كل ست بقيت موزه بلسانها وعقلها وطريقه تفكيرها بدلا من النكد والجليطه الكدابه عند بعضهن عندما تقول أنا وبعدي الطوفان

اضف تعليق

تم أضافة تعليقك سوف يظهر بعد المراجعة



مشاركتك بالتعليق تعنى أنك قرأت بروتوكول نشر التعليقات على اليوم السابع، وأنك تتحمل المسئولية الأدبية والقانونية عن نشر هذا التعليق بروتوكول نشر التعليقات من اليوم السابع
الرجوع الى أعلى الصفحة