فاكر أنا فاكر
فضلك ومش ناكر
وليكى أنا شاكر
يا اللى ولدتينى
.........
فاكر أنا إيديكى
ولمستك شعرى
وبسمتى ليكى
ولو كنت يوم أبكى
بكايا كان يحكى
قصة أنا أرويها
عن كل اللى تاعبنى
وكنتى اللى فاهمانى
ومن غير ما أقول تانى
بحنان بتروينى
..........
فاكر أنا فاكر
فضلك ومش ناكر
يا اللى إنتى نور عينى
إنتى اللى كنتى معايا
تحكيلى فى حكاية
وتقولى يا ضنايا
عايزاك تنام مبسوط
تحكى وأسمعلك
وأحفظ وأسمعلك
وبيكى أنا مبهور
...........
فاكر أنا فاكر
فضلك ومش ناكر
فاكر لأول يوم
عرفت طعم اللوم
من نظرة فى عنيكى
كانت كتاب مفتوح
فيها الملام مشروح
بالنظره تربينى
وفاكر أنا دموعك
ما أنا كنت موضوعك
وبيا الفؤاد مشغول
فاكر لصوت ينادينى
فى الضلمة يا حبة عينى
يا قلبى روح الروح
ولصدرك تضمينى
وفى لحظة بُكايا يِروح
.............................
فاكر يا ست الكل
صبرك فى عمره ما مل
ولا عمرك جرحتينى
فاكر سنين وشهور
وليالى مهما تطول
كنتى اللى سهرانه
وفى مرضى تعبانه
وإن قولت مرة الآهــ
فى قلبك يرن صداهــ
يارب يحميكى
وفى الجنة أكون وياكى
منا عاشق تراب رجليكى
تم أضافة تعليقك سوف يظهر بعد المراجعة