مفطّراتي.. ماشي بآلاتي
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتي
مفطّراتي.. ماشي بآلاتي
بنقول له يا الله يا مأدّناتي
ادّن وكبّر.. الفول مشبّر
والباميه.. تسلم.. إيدين مراتي
هاتوا الإذاعه.. حطّوا البتاعه
لمّتنا تحلا.. صحبه وجماعه
فين عرقسوسي.. ضاعت فلوسي
ادّن يا عمّي.. يا أبو عمّه روسي
سلّيت صيامي.. والجوّ حامي
صلّيت صلاتي ورميت سلامي
أمّي النهارده.. جايبالي ورده
وعيونها شارده علشان حماتي
لفّيت حواري.. ساعة العصاري
ومشيت أغنّي فوق الكباري:
● ● ●
طبلتي دقّت ودارت
في المداين واستدارت
صحّت النايمين وجارت
كلّ ناسنا اللي استجارت
جانا أوّل يوم مبارك
قوم يا بطرس صحّي جارك
ياللي حاصر أرض مَريم
بكره تهرب من حصارك
طبلتي دقّت عليكم
قوموا وإيدينا ف إيديكم
مصري/ تونسي/ / سوداني/ ليبي
أسمر اللون أو حليبي
طبلتي دايره ف واديكم
صرخه ضد اللي يعاديكم
الصلا تجمع صفوفنا
والرقاب تعشق سيوفنا
واللي طاف يعرف ف يفهم
إننا من قبله طوفنا
● ● ●
مفطّراتي.. ماشي بآلاتي
ويّايا طبله ومغنّواتي
بنقول له يا الله يا مأدّناتي
ادّن وكبّر.. الفول مشبّر
والباميه.. تسلم.. إيدين مراتي
عدد الردود 0
بواسطة:
عماد عبد الراضى
رائعة
كعهدى بك يا صديقى.. شاعر رائع