بالصور.. صدمة فى السوشيال ميديا بعد طلاق "جولى وبيت".. مدونون لـ"براد": "اللى ييجى على الولايا ما بيكسبش.. واوعى تكون خدت الدهب".. ويخاطبون أنجلينا: "ربى عيالك ومتشمتيش جينفر آنستون فيكى"

أصابت رواد مواقع التواصل الاجتماعى مشاعر متباينة من الحزن و"الألش"، عقب طلاق النجمة العالمية أنجلينا جولى من زوجها براد بيت، بعد قصة حب عنيفة على مدار 12 عامًا، وعبروا عنها فى مئات التغريدات والتدوينات التى ملأت مواقع التواصل الاجتماعى.

وظهرت سخرية المغردين من خلال هاشتاج حمل اسم النجمين، حيث قالت ندى نادر: "طب والعيال اللى متبنيهم عشان ما يتشردوش.. هتشردوهم انتو كده"، أما "أميرة أحمد" فقالت: "هى أهملت نفسها وبتجرى على ملاجئ وملت له البيت أيتام وخست ولا صحة ولا شفايف".

وأضاف أحمد: "بس اوعى تكون خدت الدهب بتاعها معاها وبعدين تدفعهولك تانى دا غير العفش والنفقة"، وقالت أخرى: "ألف مبروك يا جولى، بكرة أجبلك سيد سيدو.. ولا تزعلى"، وقالت أميرة النبراوى: "بقى ١٢ سنة مستحملين وأول ما يتجوزوا ما يستحملوش سنتين"، فيما قالت فاطمة حمدى: "يااااااالا.. هما اللى تجوزوا كانوا خدوا إيه يعنى بلا ارتباط بلا بتنجان، محدش بقى معاه رقم براد بيت".

وقال عادل فهيم: "كلته لحم ورميته عظم"، وقال إسلام: "قطيعة البيوت مقفلة على بلاوى"، وقالت أخرى: "زمانها جينيفر أنيستون خرباها، ربى عيالك يا أنجلينا ومتشمتيش العوازل يا بت، جتك خيبة يا عبيطة"، وقالت ياسمين: "اللى بيجى على الولايا مابيكسبش يابراد يا ابنى"، فيما قالت دعاء: "أتمنى أن الأخت أنجلينا جولى ماتكبرش المواضيع، هى وخداه أصلا من حضن جينفر أنيستون، يعنى مش جيباه من على سجادة الصلاة".