نصر فتحى اللوزى يكتب: فى خبر كان

هو... هو... وها هو هو كمان وكمان
طب ليه كدا واحنا عارفين بأنك إنسان؟
زى ما أنت شايف تحت الكبارى نعسان
ومن الشارع أكلى يهرب منه الحيوان
إنسانيتى آه نسيوها بقت فى خبر كان
أرصفة وتحت الكبارى هو ده العنوان
بيجامتى اليتيمة تايهة مع كل الألوان
مكتوب بخط اللوزى هنا ترقد الأحزان
أنا غيران من منتجع كلاب محظوظين
نايم آكل شارب أحسن من البنى آدمين
الإقامة بمرتب من الشباب 2 خريجين!

يتجوز حبيبته وكوشة وزفة للعروسين
وشهر العسل مع كلبته بجانت البيسين
الأكل من بلاد بره يأكل بشوكة وسكين
يسهر على راحة جنابه فريق الخدامين
وتجنبا من الاكتئاب يبرطع فى البساتين
ومعاه حبيبته فى أحلى وأجمل الفساتين
وفى الليل أحضان على سرير العاشقين
غرفة نوم مكيفة وستاير بمبى للتزيين
أهوهو بقى والا عايزنى أعيش مسكين؟
هوهو وسمع ناس عن الرحمة غايبين
يارب كرمتنا بالعقل ومنا ناس مجانين
أولاد الشوارع بالرحمة منهم منسيين
وناس بتكمل عشاها نوم بآهات وأنين
ياناس خافوا ربنا وارحموا كل مسكين
الرحمة على الحيوان بعد البنى آدمين
رحمة بدون مبالغة متكونوش ملاعين
حكموا العقل بحكمة قبل فوات الاوان
فى يوم فيه يكرم المرء بعمل او يهان
واسعوا بخيرات لا تكونوا فى حرمان
واحبوا للفقراء ماتحبه لنفسك ياانسان
يكن لك يوم البعث شفيعا تنال غفران