بالصور.. جيولوجو الثورة المعدنية يواصلون اعتصامهم لزيادة الحوافز 800%

الإثنين، 30 أبريل 2012 - 03:50 م

جانب من الاعتصام جانب من الاعتصام

كتبت – نجلاء كمال - تصوير محمد إبراهيم

واصل حوالى 250 جيولوجيا اليوم الاثنين اعتصامهم الذى بدأوه أمس أمام مقر هيئة الثروة المعدنية، للمطالبة بضرورة زيادة مرتبات العاملين بالهيئة وزيادة الحوافز إلى 800%، أسوة ببعض الشركات التابعة للهيئة، وكذلك العاملين بقطاع البترول، بالإضافة إلى تطبيق الكادر البحثى مثل هيئة الطاقة النووية وزيادة بدل المخاطر.

وطالب المعتصمون الدكتور كمال الجنزورى رئيس الوزراء والمهندس عبد الله غراب وزير البترول بضرورة تشكيل لجنة لتحقيق فى وقائع الفساد بالهيئة، مؤكدين وجود العديد من التجاوزات التى يرتكبها مجلس إدارة الهيئة، ومنها تعيين مستشارين لرئيس الهيئة بمرتبات مبالغ فيها، مع وجود محاباة فى منح المكافآت وقصرها على أشخاص بعينهم وحرمان باقى العاملين منها.

وانتقد الجيولوجيون إهمال الحكومة لهيئة المساحة الجيوليوجية، حيث كانت ثانى مساحة جيولوجية بعد هيئة المساحة الجيولوجية البريطانية والتى أصبحت حاليا مقبرة للعلم بدلا من أن تكون صرحا كبيرا للعلم كما كانت من قبل، خاصة وأن العمل بها يفتقد الآن إلى خطط حقيقة للعمل، مشددين إلى ضرورة أن يتم فصل الهيئة عن وزارة البترول والمالية وجعلها كيانا مستقلا مثلها مثل باقى الهيئات على مستوى العالم.

وقال حمدى العريف كبير فنيين بالهيئة إن هناك تجاوزات كبيرة من قبل المسئولين بالهيئة مما يساهم فى إهدار ثروات البلاد، لافتا إلى أن الاهتمام بالثروة المعدنية من شأنه أن يسدد ديون مصر.

وأكد العريف أهمية تلك الهيئة والتى كان لها دور كبير فى استعادة طابا بعد الخريطة التى قدمتها وبينت ذلك، لافتا إلى وجود العديد من التجاوزات فى عدد من الإدارات منها إدارة المناجم والمحاجر، ومجلس الإدارة، ومتابعة الشركات، مع اعتماد عقود للاستغلال من تحت الترابيزة، حيث يتم تحديد أماكن تواجد المعدن فى الصحراء ويتم إسنادها إلى عدد من الرجال الأعمال بعينهم .




















تعليقات (27)

1

اللي مايشوف من الغربال

بواسطة: sasa

بتاريخ: الإثنين، 30 أبريل 2012 04:12 م

حسبنا اللة ونعم الكيل صحيح لكم حق انتم زي ريسكم المحبوس اختشوا علي ددددددددددد

2

السكري ملك للشعب وبلاش الطمع

بواسطة: عبد الرحمن

بتاريخ: الإثنين، 30 أبريل 2012 04:46 م

يطلبون 800% واغلب موظفي الدولة لا يزيدوا عن 200% من المرتبات الضعيفة المعدومة ، حرام على موظفي وعمال البترول الافتراء وتركوا شوية لموظفي الدولة ، لان منجم السكري ليس ملكا لموظفي البترول بل ملك للشعب كله وكذا كافة موارد الدولة

3

الى رقم 1

بواسطة: حامد

بتاريخ: الإثنين، 30 أبريل 2012 05:07 م

انا مشعارف قصدك ايه ياللى ببتتكلم انت قصدك ايه

4

حرام

بواسطة: reda ali

بتاريخ: الإثنين، 30 أبريل 2012 05:51 م

الله يخرب بيت الثورة اللى خلت الشعب كله طماع وكله همه الاول نفسه فقط والبلد تخرب الثةرة الملعونة دى هتدمر البلد لازم الثورة تكون فى النفوس والعقول يا مصريين وعليه العوض ومصر بتغرق ....... الحقوها

5

قلة ادب

بواسطة: متغاظ بس مش هطقء

بتاريخ: الإثنين، 30 أبريل 2012 06:30 م

800% حوافز والتربية والتعليم تعطي حامل درجة الدكتوراه 200جنية وبعد الخصم 170 يبقي دي قلة ادب من مين منوزارة التربية والتعليم ولا من الجولوجيين

6

ليه يعنى

بواسطة: نانسى

بتاريخ: الإثنين، 30 أبريل 2012 07:57 م

ليه يعنى 800% ؟؟؟؟؟؟ ياعينى على اللى مش لاقى قوت يومه

7

المعلقين الكرام

بواسطة: بطاطا

بتاريخ: الإثنين، 30 أبريل 2012 11:17 م

البهوات الى بيردوا وللأسف معندهومش ادنى علم بأى شئ احب اقول لهم ( الى مايشوفش من الغربال يبقى اعمى ) لما مرتبك كلوا يكون 600 جنيه تاكل وتأكل ولادك منين لما تنزل الصحراء وتكون عارف انك معرض لأى وقت انك تموت بسبب ثعبان او طريشه وطبعا حضرتكم متعرفوش ايه هيا الطريشه
اما بالنسبه للاستاذ الى بيتكلم عن السكرى نحن لم نطالب باجر لنا من السكرى بس اقرأ القانون شويه هتعرف ان السكرى تابع لهيئه يجب ان تأخذ نسبه منه ودا قانون دولتك واعتراض الجميع كان على النسبه الى فارضها قانون الدوله الذى لم ينفذ
والاستاذ الى بيقول الدكتوراة 200 وكلام من كده بس مرتب اقل مدرس فى التربيه والتعليم وصل كام فمنظلمش ناس مش لاقيه تصرف على ولادها ولا تعرف تأكلها
وعملا بميادئ الثورة الى اشك ان ائ فرد من المعلقين متفق معاها وهذة المبادئ هى ( عيش - حرية - عداله اجتماعيه ) اقنعونى كيف تتحق هذه الحياة بمرتب 600 جنيه اتعتقدون مثل الفراعنه انها سوف تتحقق فى الحياة التى بعد النهايه ام انها سوف تتحقق على ارض الواقع
اما بالنسبه زيك زى المخلوع ماهو زى ماقلت الى مايشوفش من الغربال يبقى أعمى فلا تحكم على جهاله او تحكم على سمع

8

مش هنسيب حقوقنا

بواسطة: ahmed hamdy

بتاريخ: الثلاثاء، 01 مايو 2012 01:29 ص

معتصمين لحد ما ناخد حقوقنا و نعيش حياه أدميه

9

ادينا عرفنا ليه اتخلفنا ع الدول البترولية و التعدينية !!!!!!!!!!!!!

بواسطة: فتحى

بتاريخ: الثلاثاء، 01 مايو 2012 01:44 ص

الوظائف البحثية مفروض تبقى اعلى مرتب فى البلد ، علشان كدة احنا اتخلفنا حتى عن البلاد العربية اللى كنا بنتباهى اننا متقدمين عنهم ، طالما واحد شغال فى شركة بترول و بياخد 5الاف و التانى شغال فى هيئة بحثية زى دة ، اللى مفروض انها هى اللى بتقدر احتياطى الثروات المصرية التعدينية ع حد علمى ،
ياريت اليوم السابع يركز ع المواضيع دة اللى بتعرض

10

اين التعليق ياجريدة

بواسطة: محمد حسينى

بتاريخ: الثلاثاء، 01 مايو 2012 08:57 ص


للاخوة المنتقدين الاعتصام
هل تعلم ماهى وظيفة الجيولوجي ؟ واين مكان عملة ؟
قبل ان تعلق لابد ان تعلم ان هذه الوظفية مليئة بالمخاطر وتطلب عناية فائقه لان مكان عملك فى المناطق النائيه فى صحارى مصر
هل تعلم كم يتقاضى هذا الجيولوجي
انه يتقاضى 621 جنيه شهريا ويتقاضى 3 جنيه بدل انتقال شهرى
يبقى المجموع 625 جنيها مصريا فقط لاغير
والمطلوب منه استكشاف معادن مصر والمحافظة عليها
ولتوضيح الحقيقة وراء الاعتصام كاملة
للمطالبة
بتعديل قوانين التعدين للسماح للمستثمرين بالاستثمار وجلب شركات جديده مع المحافظه على حق الدوله فى الحصول على كامل مستحقاتها
مع توفير الشفافية الكاملة فى عقود الهيئة مع الشركات والمناجم
جعل الهيئة فى كيان مستقل مع ضم المحاجر حتى يتسنى لجهه واحده الاشراف على ثروات مصر للمحافظة عليها بدلا من تشتيتها بين المحليات والمحافظات واهدارها وفى النهايه نقول اين ثروات مصر التعدينية
توفير المعدات اللازمه للعاملين لاستكشاف المعادن فى صحراء مصر وتوفير بعثات واقامات ادمية للجيولوجيين
كيف تطلب من شخص الاخلاص فى عملة وهو لايجد قوت يومة كيف يشرف على المناجم وكيف ينتج وكيف يعيش وهو يجد ان المدرس يحصل على الفين جنيه شهريا وهو فى منزلة
والجيولوجي فى الصحراء لايتقاضى ربع مرتبة والمطلوب منه الابداع والابتكار والاستكشاف
لكى نفعل هذه المعانى ( الابتكار - الاخلاص - الاستكشاف - اتقان العمل ) لابد ان نكون مخلصين لهيئتنا ولكى نكون مخلصين لها لابد ان نكرس حياتنا لها ولكى نكرس حياتنا لها لابد ان نجد مقابل يضمن لنا كرامة العيش
من الممكن ان اتغاضى عن طلب اى زياده فى الاجر
وان استمر فى هذا الاجر
ولكن انتظر منى
عدم الاخلاص فى عملى لانى سأبحث عن عمل اخر فى نهاية اليوم
عدم الاتقان فى عملى لانى سأقول اننى لا اتقاضى منه شيئا
عدم المحافظة على مواردى لاننى سأقول كده كده انا ماليش دعوة وانا مش فاضى ليهم
انتظر منى ان اكون موظف حكومى روتينى كل ما يربطنا بالهيئة هى دفاتر الحضور والانصراف ( 90 فى المئه من الحكومة كده ) ولن نرقى بمصر ابدا طالما ظللنا بهدا الفكر
هل يعقل
راتب 100 جيولوجي بالثروة المعدنية المصرية يساوى راتب 20 جيولوجي بهيئة البترول المصرية
قوانين التى تنظم عمليه التعدين فى مصر منذ سنة 54 لم تحدث حتى الآن
ان يعيش الجيولوجى فى وسط الصحراء والمخاطر وفى اسوء الظروف ويتعاطى راتب لايساوى تذاكر سفر بالطيران الى مكان بعثتة

العقل يحتم علينا ان نقول
ان جيولوجى الثروة المعدنيه هو المستقبل ويجب ان نضمن له حياة كريمة تضمن له الابداع فى عمله وتجعله مستكشف عالمى ليساعد على تنمية ونهوض الثروة المعدنية فى مصر

مطالبنا
( توفير حياة كريمة لكل جيولوجى فى الهيئة ) حتى نساعد الهيئة على نهوض وتنمية مصرنا الحبيبة
تحديث مراكز التفتيش ومعدات البعثات بما يضمن الوصول لافضل النتائج
ضمان حق الدوله الكامل فى استغلال مواردها المعدنية
الشفافية الكاملة ووضع خطه بجدول زمنى لجميع ادارات الهيئة ليعلم كل شخص دوره فى اثراء الهيئة ودورة فى تطوير وتحديث الهيئة
مع عدم تردد نغمه انت موظف مش ليك انك تعرف الكلام ده المفروض اعرف خطه الهيئه علشان اعرف دورى واتقنة واكون على دراية كاملة ويكون فيه شفافية بينا كلنا

نهاية حتى لاتكثر البلبة وكلام الصحف
ندين بالفضل لله عز وجل ثم الى رئيس الهيئة الموقر جيولوجي فكرى يوسف لانه هو الشخص الوحيد الذى سمع لنا وهو الوحيد بالهيئه من يرغب فى حل مشكلتنا بكل شفافية
ونشكره على سعة صدرة لنا وهذا ليس نفاقا ولكن اعتراف بالفضل ورغم ان هذا الاعتصام يضره كثيرا ولكنه فى جانبنا واعلنها اكثر من مره انه معنا لذلك لانريد ان تردد الصحف اى كلام اخر

11

الظلم هو السبب

بواسطة: محمد أبوتتي

بتاريخ: الثلاثاء، 01 مايو 2012 01:17 م

يا جماعة الثورة ليس لها علاقة بما يحدث , هذا نتيجة الظلم الواقع في البلد وهذه هي تركة الرئيس الفاسد ونظامه المستبد الظالم التي تركها للشعب , لما يبقي الوزير ومستشاريه ومساعديه بياخدوا ملايين و الناس مش لاقيه تاكل , انا أقسم بالله ليا واحد صاحبي في الاعتصم يبقوللي مرتبهم 600 جنيه ! مع إن الهيئة ده أكبر هيئة بتتنتج للبلد لأنها ماسكة التعدين بتاع البلد كله لكن حاميها حراميها ؟ يا جماعة ده فيها منجم السكري بتاع الدهب بيدخله لوحده ملايين ده غير الفوسفات والمعادن التانية ؟ إحنا محتاجين عدالة اجتماعية وناس تمسك يبقي عندها ضمير وحسبي الله ونعم الوكيل في اللي يسرق مال بلده حسبي الله ونعم الوكيل

12

الى المنتقدين

بواسطة: islam abdo

بتاريخ: الثلاثاء، 01 مايو 2012 01:20 م

الجماعه الأفاضل اللى عماله تتنتقد وخلاص - احنا اساسينا 258 وبدلتنا تعبانه جدا ومرتبنا فى الاخر بيوصل 600 - بالاضافه ان احنا مبنتتكليميش على المرتبات بس احنا عندنا فساد كتير جدا فى الهيئه - والهيئه هى الجهه الوحيده المسئوله عن موارد مصر التعدينيه - يعنى ثروات البلد بتتنهب - ياريت تكونوا فهمتوا ومتتكلموش من غير متعرفوا كل أبعاد الموضوع - احنا معتصمين عشان نطهر هيئتنا من الفساد ولازم أى واحد فى أى مكان يطهر المكان اللى هو فيه من الفساد - احنا فى عصر ثوره - والساكت عن الحق شيطان أخرس

13

الناس ده عندها حق !

بواسطة: MADA YOS

بتاريخ: الثلاثاء، 01 مايو 2012 01:40 م

مش عارف اتعاطف معاهم ولا قاللهم منكم لله البلد مش مستحملة ؟
بس اللي واحد بيسمعه وبيشوفه يلتمسللهم العذر لان ده كله بسبب الفساد الموجود في كل حتة في البلد , المفروض يبقي فيه عدالة في المرتبات ............
بس 800% وسعت قوي منهم

14

تحروا الصدق قبل الحكم

بواسطة: hossam

بتاريخ: الثلاثاء، 01 مايو 2012 04:03 م

هى مش وسعت ولا حاجة اللى مش مصدقنا ومش مصدق اننا بناخد621 جنية يجى يوم الاربعاء الساعة 11 صباحا فى الهيئة وانا اوريه شيك القبض وافرادات المرتب

15

مهلا يا معلقين ؟

بواسطة: النهضة

بتاريخ: الثلاثاء، 01 مايو 2012 06:13 م

هل يعقل إن مرتب 100 جيولوجي في هيئةالثروة المعدنية لا يساوي مرتب 20جيولوجي في الهيئة العامة للبترول ؟ علي الرغم إننا دخلنا امتحان واحد بل يوجد بيينا اوائل خريجين !!!!!!
في النهاية المرتب 620 جنيه يعني لو يا دوبك هيقضيني مواصلات رايح جاي وكوباية شاي يوميا ؟؟؟؟؟؟؟؟؟؟؟؟؟؟؟؟؟؟؟؟؟؟؟
المطالب دي مش فئوية المطالب دي شرعية
المطالب لخلق عدالة اجتماعية
وارجو من الجميع ان يقفوا جانب إخوانهم وابنائهم لتحقيق العدالة وكشف الفساد

16

رسالخ الى المسئولين والمعترضين على الاعتصام

بواسطة: gemy

بتاريخ: الثلاثاء، 01 مايو 2012 06:28 م

اللى معترض يقولى نعمل ايه ب 160 قرش وبعيدها قرش بدل مخاطر فى الصحرا و5 جنيه وجبه وانا قاعد فى الصحراء و تقولى معتصمين ليه لانى بعد ال800 فى الميه ديه مش هيوصل مرتبى غير 1500 جنيه للفكرين اننا هنبقى مليونيرات
واضح ان لا كرامه لنبى فى وطنه يعنى المفروض نهاجر لاى بلد بتحترم شغلنا وعلمنا عشان نقدر نعيش حياه كريمه

17

قسماً بالله معنا الحق ولنا حقوق

بواسطة: Exploration Nono

بتاريخ: الثلاثاء، 01 مايو 2012 06:52 م

بكل بساطة للمعلقين المهاجمين واللي مش عارفين يردوا علينا بإيه بالظبط

كما تفضل بعض الزملاء بالتوضيح ان مرتبنا لا يتعدى ال621 ج وفينا متزوجين ولديهم أطفال
وفينا مسئولين عن أسرهم كاملة
في شرع من ان يكون مرتب هؤلاء621ج؟؟؟؟؟؟؟؟؟
وفي شرع من يكون مرتب زملاء آخرون تم تعيينهم بعد نفس الامتحان في شركات بترول أضعاف مضاعفة؟؟؟؟؟؟؟
رجاءاً تأكدوا بداية قبل ان تهاجمونا

18

يعني ايه ؟

بواسطة: مش مهم

بتاريخ: الثلاثاء، 01 مايو 2012 07:23 م

لما يبقي موضوع تدريب للجيولوجين الجدد 120000دولار لعدد120 جيولوجي , والتدريب عبارة عن أسبوعين كل يوم واحد يلقي محاضرة ثم ناخد launch break عبارة عن كوباية شاي و باتيه لمدة 15 يوم , وعشان مبقاش كداب سلمونا شنطة اقسم بالله قيمتها لا تساوي أكثر من 10جنيه ؟
يبقي لازم تقوم ثورة تانية علشان نطهر بلدنا من الفساد

19

اه يا بلددد ... فعلا ماساه

بواسطة: KARIM NOUR EL DIN

بتاريخ: الثلاثاء، 01 مايو 2012 08:19 م

للاسف هى دى ماساة الجيولوجى فى مصر .. يطحن اربع سنين فى اصعب كلية علوم اصعب كلية فى مصر و بعدين يتخرج يقعد سنتين او تلاتة حسب نصيبة لحد مايلاقى شغل .. ويوم ما يشتغل فى مجالة ياخد 600ج ولما يطلب المساواه يتقاله دى قلة ادب و حرام وليه يعنى؟ وده قلة ادب وايه الطمع ده و يكون عرضة لكل هذا الاستهزاء عجبت لك يازمن !!!!

20

يالى مش عارف حاجة بتتكلم كتير و تظلمنا لية

بواسطة: Abdelwahab

بتاريخ: الثلاثاء، 01 مايو 2012 08:34 م

عايز اقول للناس الى بتظلمنا احنا مرتبنا فى الهيئة العامة للئروة المعدنية 625 جنية فقط لاغير و للمتزوج و عنده عيال بياخد 2 جنية على كل عيل ايوه 2 جنية انا عارف اناكاتب اية نعيش ازاى و نشتغل فى الصحراء و يطلع عينا و ممكن يحصلنا حاجة و نسافر على حسابنا و دة يبقى ظلم و افتراء و مش عايزنا نتكلم و لا نعتصم يا راجل حرام عليك و البية الى رافض اعتصامنا قولى لو كنت بتاخد المرتب بتاعنا كنت هتسكت ؟؟؟؟؟؟؟؟؟ و و حسبى الله و نعم الوكيل فىى الى ظلمنا لو مش مصدق كلامنا تعالى الهيئة يوم الاربعاء 2/5 و شوف بنفسك ............... و احنا معتصمين حتى تنفذ مطالبنا و ربنا معانا و السلام عليكم.

اضف تعليق

مشاركتك بالتعليق تعنى أنك قرأت بروتوكول نشر التعليقات على اليوم السابع، وأنك تتحمل المسئولية الأدبية والقانونية عن نشر هذا التعليق

بروتوكول نشر التعليقات من اليوم السابع

الأكثر تعليقاً