السبت، 24 يونيو 2017 12:24 م
خالد صلاح

محمد إسماعيل سلامة يكتب: نظرة حب منسية

الخميس، 29 نوفمبر 2012 09:11 م
محمد إسماعيل سلامة يكتب: نظرة حب منسية ثورة 25 يناير - صورة أرشيفية

تعالى وحطى من همك
على همى
وشقى جيوبك الفاضية
على دمى

نشف دمّى ف حواريكي
وفاضت دمعتى بيـّـه !
أنا اللى خرجت بفديكي
وروحى شايلها ف اديـه

وصدقنى اللى كان جمبي
وصدقته
ولا عرفنى ولا عرفته
شبك ايدى ومشى بيا
بئينا اتنين
بئينا متين
بئينا ف ثورة بالملايين
نزلنا نقولها .. حرية

****
نزلنا عشان كرامتنا
وناس تعبت وربتنا
نزلنا لنقطة المية

نزلنا عشان أهالينا
وناس عايشة حوالينا
بنظرة حب منسية
***
قابلنا رصاص
وماتت ناس
وع الشاشه بئوا الأنجاس
يقولوا علينا كام مية !

كسرنا الظلم والظالم
وقبل ما كله يتحاكم
خلوا بينا الحرامية

****

وبعد ما رجعت الملايين
فى لحظة
انضرب اسفين
بقت حسابات .. وتصفية
ورجعوا اللى قالوها حرام
يقولوا يجوز
وكله أوام
لحق (شلته) و (طبلية )..!

***

وقالوا انت البعيد كافر
أنا فعلا اكون كافر
عشان ما استكفى من ديني
بدقن ، وقصر جلبيه

واشيل الناس واقعدها
وامنها واكفرها
بنظرة بس بعنيا

وكله حرام
وألف امام
وناس مش عارفه أى كلام
واهو الأعمال بالنية

تدور وشك الحيران
وتبكى فرقة الإنسان
وده مسلم
وده مسيحي
وده سلفي
وده إخوان
ودى شلة عواطليه

وناس عايشه فى تكييفها
عذاب الناس يكيفها و
مفيش حاجه على كيفها
وكل خلاف بأغنية

وطن بيضيع
وكل شريف
فاضلله يومين
ويبئى ف زمرة الجرابيع
ما هيلاقي
فى بيته قرص طعميه

وطن بيضيع
وباقى يومين
ونبئى كلنا مقاطيع
لا طولنا قصاص
ولا دية !



لا توجد تعليقات على الخبر
اضف تعليق

تم أضافة تعليقك سوف يظهر بعد المراجعة



مشاركتك بالتعليق تعنى أنك قرأت بروتوكول نشر التعليقات على اليوم السابع، وأنك تتحمل المسئولية الأدبية والقانونية عن نشر هذا التعليق بروتوكول نشر التعليقات من اليوم السابع
الرجوع الى أعلى الصفحة